2025-yilda oʻquvchilar uchun darslik va daftarlar sotib olish uchun davlat budjetidan 1,3 trln soʻm ajratilishi rejalashtirilgan. Bu mablagʻlar 81 million nusxada oʻquv materiallarini taʼminlash imkonini beradi va yangi oʻquv yilida maktab oʻquvchilarining ehtiyojlarini toʻliq qoplaydi.
Biroq, ijtimoiy tarmoqlarning faol foydalanuvchilari taʼkidlaganidek, Davlat budjeti loyihasida Kitob jamgʻarmasining xarajatlari va daromadlari aks ettirilmagan. Ushbu jamgʻarma faoliyati toʻxtatildi va yangi jamgʻarma hali tashkil etilmagani sababli uni qayta tiklash toʻgʻrisidagi maʼlumot budjet loyihasida koʻrsatilmagan.
Bundan tashqari, hukumat 2025-yilda ota-onalardan darsliklar va daftarlarni ijaraga olish uchun qoʻshimcha toʻlov undirilishi rejalashtirilmaganini maʼlum qildi.
Iqtisodiyot va moliya vazirligining aniqlik kiritishicha, koʻzda tutilgan mablagʻlar kelgusi oʻquv yili uchun oʻquvchilarning oʻquv materiallariga boʻlgan ehtiyojini toʻliq taʼminlaydi.
