Repinning “Ivan Grozniy va uning oʻgʻli Ivan” surati restavratsiyadan soʻng Tretyakovka ekspozitsiyasiga qaytdi. 2018-yilda uni galereya tashrif buyuruvchisi shikastlagan edi
Suratning doimiy ekspozitsiyaga qaytarilgani haqida madaniyat vaziri Olga Lyubimova maʼlum qildi, deb yozmoqda RIA Novosti.
Eslatib oʻtamiz, 25-may kuni kechqurun Davlat Tretyakov galereyasi (DTG) tashrif buyuruvchisi Ilya Repinning “Ivan Grozniy va uning oʻgʻli Ivan 1581-yil 16-noyabr” (shuningdek, “Ivan Grozniy oʻz oʻgʻlini oʻldirmoqda” nomi bilan ham tanilgan) asarini shikastlagan. Rossiya IIV xabariga koʻra, erkak toʻsiq metall ustunchasi yordamida surat oynasini sindirib, unga bir necha marta zarba bergan va uch joydan yirtib tashlagan. IIV xabarida suratning nomi koʻrsatilmagan, biroq tez orada gap aynan Repinning mashhur asari haqida ketayotgani maʼlum boʻldi.
Mutaxassislar zararni 30 million rubl (~287 987 dollar) deb baholashdi. “Ekspertiza oʻtkazilib, suratda koʻplab shikastlar borligi aniqlandi”, — deya prokuratura xodimining soʻzlarini keltirmoqda “Interfaks”. Suratning qiymati taxminan 730 million rubl (7 million dollardan ortiq) deb baholanmoqda.
Sudda soʻzga chiqqan suratni shikastlashda ayblanuvchi Igor Podporin asar, uning fikricha, “dindorlar va Rossiya aholisining tuygʻularini haqorat qiladi”, dedi.
Natijada 2019-yil aprel oyida Moskvaning Zamoskvoretsk sudi erkakni ikki yilu olti oyga umumiy tartibli koloniyaga hukm qildi.
Ilya Repin — rus rassomi va grafikasi, islohotlar davrining eng nufuzli va serqirra rassomlaridan biri, yozuvchi va pedagog.
