Daniya qirollik gerbiga o‘zgartirishlar kiritib, unda Grenlandiya ramzini kuchaytirdi, deb xabar berdi The Guardian. Bu qaror AQShning sobiq prezidenti Donald Trampning dunyodagi eng yirik orolni sotib olish niyati haqidagi bayonotlaridan keyin qabul qilindi.
Dekabr oyida qirol Frederik X Norvegiya va Shvetsiya bilan tarixiy ittifoq ramzi bo‘lgan va 500 yildan ortiq vaqt davomida uning bir qismi bo‘lib qolgan uchta tojni gerbdan olib tashlashni buyurdi. Bundan tashqari, Grenlandiya va Farer orollari gerblari (oq ayiq va qo‘y) gerbning ikkinchi va uchinchi maydonlariga ko‘chirildi, Daniya va Janubiy Yutlandiya ramzlari esa birinchi va to‘rtinchi maydonlarni egalladi.
The Guardian nashrining yozishicha, gerbning o‘zgarishi Grenlandiya maqomi va uning tashqi siyosat va orol xavfsizligini nazorat qiluvchi Daniya bilan munosabatlari haqidagi bahslarning keskinlashuviga javob bo‘ldi. Qo‘shimcha omil Trampning AQSH milliy xavfsizligini ta’minlash uchun Grenlandiyaga egalik qilishning strategik ahamiyati haqidagi bayonotlari bo‘ldi.
Avvalroq Tramp Grenlandiyani sotib olish butun dunyoda erkinlikni himoya qilish uchun "mutlaqo zarur" ekanini ta’kidlagan edi. Biroq, orol bosh vaziri Mute Egede Grenlandiya "sotilmaydi va hech qachon sotilmaydi" deb aytdi va shu bilan birga Daniyadan mustaqil bo‘lishga intilishini bildirdi.
Shu bilan birga, Trampning o‘g‘li kichik Donald Tramp Grenlandiyaga tashrifini e’lon qilib, orol AQShga qo‘shiladigan bo‘lsa, aholiga sezilarli imtiyozlar berishni va’da qildi. Biroq, Danmarks radiosining aniqlik kiritishicha, Tramp delegatsiyasining Grenlandiya rasmiylari bilan uchrashuvlari rejalashtirilmagan.
Grenlandiya maydoni 2,166 mln kv. km. bo‘lgan dunyodagi eng katta orol bo‘lib, uning 80% ga yaqini muz bilan qoplangan. U Daniyaning avtonom hududi bo‘lib, uning 50 mingdan sal ko‘proq aholisi asosan inuitlardan iborat. Grenlandiya poytaxti Nuuk shahri hisoblanadi.
