2025-yil 1-sentyabrdan kompaniyalarni “yashil tadbirkorlar” sifatida tan olish platformasi faoliyat boshlaydi. Tegishli qaror prezident farmoni bilan tasdiqlangan.
Ushbu maqomni olish uchun kompaniyalar bir qator talablarni bajarishlari lozim. Bular qatoriga korxona atrofida “yashil hududlar” yaratish, tomchilatib, yomg‘irlatib yoki konteynerlarda sug‘orish texnologiyalaridan foydalangan holda sug‘orish tizimlarini o‘rnatish kiradi. Bundan tashqari, korxonalar energiya tejovchi uskunalarni joriy etishlari, ekologik qonunbuzarliklarning oldini olish va atmosferaga chiqariladigan chiqindilarni kamaytirishga qaratilgan onlayn monitoring tizimlarini o‘rnatishlari shart. Shuningdek, kompaniyalar aylanma iqtisodiyot tamoyillariga, shu jumladan chiqindilarni kamaytirish va resurslardan qayta foydalanishni ko‘zda tutuvchi 7R modeliga o‘tishlari kerak.
“Yashil tadbirkorlar”ga qo‘llab-quvvatlash choralari, jumladan “Shaffof qurilish” platformasiga ustuvor kirish huquqi, ma’lum muddatga ekologik tekshiruvlardan ozod qilish, xalqaro bozorlarga chiqishda yordam ko‘rsatish va Tadbirkorlik sub’yektlarining barqarorlik reytingida qo‘shimcha ballar bilan ta’minlanadi.
2025-yil 1-apreldan qayta tiklanuvchi energiya manbalaridan olinadigan elektr energiyasi uchun “yashil tariflar” ham joriy etiladi. Bu esa bunday manbalardan ham korxonalar, ham aholi foydalanishini rag‘batlantiradi.
Imtiyozlar biogaz, chiqindilar, shamol va quyosh energiyasidan foydalangan holda ishlab chiqarilgan elektr energiyasiga tatbiq etiladi. Ushbu qurilmalar tashkilotlar hududida joylashgan bo‘lishi lozim. Quyosh panellaridan foydalanuvchi aholi ham ortiqcha elektr energiyasini davlatga imtiyozli tariflarda sotish imkoniyatiga ega bo‘ladi.
