Toshkent xalqaro aeroportida uysiz mushuklar uchun maxsus uychalar paydo boʻldi. Ular havo zali va uchish terminalining asosiy binosi oʻrtasidagi yashil zonada joylashgan, deb xabar beradi Uzbekistan Airports matbuot xizmati.
Tashabbus “Mushukkent” loyihasi va Toshkent arxitektura-qurilish universiteti talabalari bilan hamkorlikda amalga oshirildi. Uylar ekologik toza, vandaga qarshi va yonmaydigan materiallardan qurilgan. Ular qishki davr uchun isitish tizimi va yozgi davr uchun ventilyatsiya bilan jihozlangan.
“Mushuklar shahar muhitining tabiiy aholisi boʻlib, oʻzlarining ekologik oʻrniga egadirlar. Poytaxt aeroportida doimo mushuklar boʻlgan. Bu jonzotlarning odamlarga foydasi oydin, yoqimli estetikadan tashqari, ular uy sichqonlarini va hatto kalamushlarni yoʻq qiladigan haqiqiy ovchilardir. Bizda ular uchun uylar oʻrnatish gʻoyasi anchadan beri bor edi, biroq aeroportda bir necha yillardan buyon olib borilayotgan qurilish ishlari tufayli bunday imkoniyat endigina paydo boʻldi”, — deyiladi xabarda.
Uzbekistan Airportsʼning taʼkidlashicha, aeroport mamlakat mehmonlari koʻradigan birinchi narsa.
“Bunday uylarning mavjudligi hayvonlarga va umuman madaniyatga boʻlgan gʻamxoʻrlik darajasini koʻrsatadi”, — deya qoʻshimcha qildi kompaniya.
Qayd etish joizki, 2019-yilda ishga tushirilgan “Mushukkent” loyihasi davlat organlari va nodavlat tashkilotlari tomonidan qoʻllab-quvvatlanmoqda. Uning asosiy maqsadi hayvonlarga nisbatan insonparvarlik munosabatini targʻib qilish, uysiz mushuklar populyatsiyasini nazorat qilish va ularga nisbatan shafqatsiz munosabatda boʻlganlik uchun jazoni kuchaytirishdan iborat.
