Istanbulda qalbaki alkogolli ichimliklarni tayyorlash va tarqatishda ishtirok etgan Turkmanistonning ikki fuqarosi qo‘lga olindi. Bu haqda O‘zbekistonning Istanbuldagi bosh konsulxonasi xabar berdi.
So‘nggi sutkada Istanbulda qalbaki spirtli ichimliklarni iste’mol qilgandan so‘ng 38 kishi zaharlandi. Shifoxonaga murojaat qilganlarning 11 nafari vafot etgan.
Politsiya hodisani o‘rganish bo‘yicha keng ko‘lamli tekshiruv boshladi. Aniqlanishicha, tibbiy yordam so‘rab murojaat qilganlarning 26 nafari chet el fuqarolari hisoblanadi.
Mazkur voqeaga aloqadorlikda ayblanayotgan Turkmanistonning ikki fuqarosi qo‘lga olinib, ularga nisbatan jinoyat ishi qo‘zg‘atilgan.
Ayni paytda qalbaki alkogol tufayli halok bo‘lgan O‘zbekiston fuqarolari soni olti nafarga yetdi. Ular orasida besh erkak va bir ayol bor.
