AQSH davlat kotibi lavozimiga nomzod Marko Rubio Jekson-Venik tuzatishini zamonaviy voqelikka mos kelmaydigan sovuq urush qoldig‘i deb atadi. Bu haqda u Senatning tashqi ishlar bo‘yicha qo‘mitasida o‘z nomzodini ko‘rib chiqishga bag‘ishlangan eshituvlar chog‘ida ma’lum qildi, deb yozadi TASS.
1974-yilda qabul qilingan tuzatish AQShning Sovet Ittifoqi bilan savdo aloqalarini rivojlantirishni yahudiy emigratsiyasi huquqini ta’minlash bilan bog‘ladi. Rubioning so‘zlariga ko‘ra, bugungi kunda Markaziy Osiyo davlatlariga nisbatan ushbu chorani saqlab qolish maqsadga muvofiq emas.
"Bu o‘tgan davrdan qolgan yodgorlik. Uni bosim vositasi deb hisoblovchilar bor, ammo hozirgi sharoitda bu bema’ni ko‘rinadi," - dedi Rubio.
Uning qo‘shimcha qilishicha, AQSH Savdo vazirligi Qozog‘istonni bozor iqtisodiyoti deb tan olgan, bu esa eskirgan yondashuvlarni qayta ko‘rib chiqish zarurligini ta’kidlaydi.
Mutaxassislarning taxmin qilishicha, Rubioning davlat kotibi lavozimiga tasdiqlanishi deyarli muqarrar. Uning nomzodini respublikachilar ham, demokratlar ham qo‘llab-quvvatlamoqda. 2011-yildan beri Rubio Florida shtatidan senator bo‘lib, tashqi siyosat kun tartibini ishlab chiqishda faol ishtirok etmoqda.
