Ijtimoiy tarmoqlarda dorixonalardan birining talanishi, unda erkak xodimga pichoq oʻqtalib, kassadan pul olayotgani aks etgan video tarqaldi.
Zor-TV axborot dasturida xabar berilishicha, hodisa 13-yanvar kuni soat 23:05 atrofida Chirchiq shahrida yuz bergan. Erkak pichoq bilan dorixonaga bostirib kirib, sotuvchini qoʻrqitib, pul talab qilgan. U qurol bilan tahdid qilib, kassadan 700 ming soʻmni olib, voqea joyidan qochgan.
“Jinoyatchi tezda qoʻlga olindi — u spirtli ichimlik isteʼmol qilgan 32 yoshli fuqaro ekan”, — deya xabar berdi Toshkent viloyati IIBBsi.
Unga nisbatan Jinoyat kodeksining 164-moddasi (Qurol ishlatib talonchilik qilish) boʻyicha jinoyat ishi qoʻzgʻatildi. Tergov ishlari olib borilmoqda.
