19-yanvar, yakshanba kuni Gʻazo sektorida Isroil va Falastinning HAMAS radikal guruhi oʻrtasida 15 oydan ortiq davom etayotgan urushga chek qoʻyishga moʻljallangan olti haftalik yarashuv bir necha soatga kechiktirilishi bilan kuchga kirdi.
Oʻt ochishni toʻxtatish Moskva vaqti bilan soat 9:30 da boshlanishi kerak edi, ammo HAMAS Isroilga birinchi navbatda ozod qilinadigan garovdagilar roʻyxatini bermaganligi sababli toʻxtatildi.
Ushbu roʻyxat Isroilga keyinroq topshirildi, natijada oʻt ochishni toʻxtatish toʻgʻrisidagi bitim faqat 12:15 da kuchga kirdi. Isroil bosh vaziri Binyamin Netanyaxu avvalroq Falastin guruhi garovga olinganlarning kerakli roʻyxatini taqdim etmaguncha yarash boshlanmasligini aytgan edi.
HAMAS bunga javoban Isroil erishilgan kelishuvlarga rioya qilish niyatida ekanini va garovga olinganlar roʻyxatini taqdim etishning kechikishini “joylardagi texnik qiyinchiliklar” bilan izohladi. Shu bilan birga, Isroil armiyasining rasmiy vakili (SAXAL) oʻt ochishni toʻxtatish toʻgʻrisidagi bitim hali kuchga kirmagani va Gʻazo sektoridagi nishonlarga zarbalar davom etishini aytib ogohlantirdi. Biroz vaqt oʻtgach, Isroil armiyasi Falastin mintaqasining shimoliy va markaziy qismlarida “terrorchi nishonlar”ni oʻqqa tutgani haqida xabarlar paydo boʻldi.
