Yongʻinlar Gollivud mashhurlarining uylarini vayron qildi
Los-Anjelesga bir necha tomondan yaqinlashgan oʻrmon yongʻinlari allaqachon 10 mingdan ortiq binoni vayron qilgan, insoniy qurbonlar bor. Shahar chekkasida joylashgan obroʻli “Pasifik-Palisayds” tumani deyarli butunlay yonib ketdi.
Jabrlanganlar orasida koʻplab mashhurlar bor. Yongʻin Paris Hiltonning uyini vayron qildi, “Yulduzli urushlar” yulduzi Mark Hemill, “Temir odam” va “Katta Lebovski” filmlarida suratga tushgan aktyor Jeff Bridjes uylaridan ayrildi. Mel Gibson Jo Roganning podkastini yozib olishdan qaytgach, oʻz uyidan faqat kul qolganini koʻrdi.
Shahar xizmatlari oʻt oʻchirishni uddalay olmayapti. Suv keladigan yongʻin gidrantlari tizimi bir vaqtning oʻzida bunday miqdordagi yongʻinlarga moʻljallanmagan. Bir yoki ikkita uy emas, butun bir tuman yonib ketganda, suv yetishmay qoladi.
Olovning tarqalishiga Kaliforniyada kuz va qishda esadigan Santa-Ana mavsumiy shamoli yordam bermoqda. U Tinch okean sohillariga juda issiq va quruq ob-havo olib keladi. Bu yil Santa-Ana shamoli gʻoyat kuchli: uning tezligi sekundiga 44 metrga yetmoqda.
Olovni tarqatishda oʻt qoʻyuvchilar gumon qilinmoqda
Gollivud guruh chatlarida bir necha kundan beri ataylab oʻt qoʻyuvchilar haqida mish-mishlar tarqalmoqda. Konspirologlar jinoyatchilar amal qilishi mumkin boʻlgan bir nechta sabablarni sanab oʻtishmoqda.
Baʼzilar ehtimoliy oʻt qoʻyuvchilarni Amerikaning eng yomon koʻrilgan sugʻurta kompaniyasi rahbarini yoʻq qilgan Luidji Manjon bilan taqqoslashmoqda. Ularning fikricha, oʻt qoʻyuvchilarni Gollivud elitasining boyliklariga boʻlgan nafrat harakatga undamoqda. Boshqalar esa bularning barchasida ekoterroristlar aybdor deb gumon qilishmoqda.
Bir nechta taniqli aktyorlar ijtimoiy tarmoqlarda oʻt qoʻyuvchilar haqida fikr bildirdi. Xususan, “Rivojlanishdagi kechikish” va “Baxtli kunlar” seriallari bilan tanilgan aktyor Garri Uinkler, “Muzyurak” multfilmida qorbobo ovozini bergan aktyor Josh Gad va “Hamjamiyat” serialida rol oʻynagan aktrisa Ivett Nikol Braun bu haqda yozishdi.
Ular, shubhasiz, Los-Anjelesning turli qismlarida sodir boʻlmoqda. Men yashaydigan hududda ikkita yongʻin sodir boʻldi, garchi yaqin atrofda birorta ham oʻrmon yongʻini oʻchogʻi boʻlmasada. Keksalarning aytishicha, afsuski, qayerdadir yongʻin chiqqanida shunday boʻladi. Yovuz odamlar shunchaki falokatni koʻrish uchun boshqa yongʻinlar uyushtiradilar
Jemel Xill
Mashhur podkaster Jo Rogan dekabr oyida rejissyor Kventin Tarantinodan intervyu olganida yongʻinni bashorat qilgan edi. Uning aytishicha, bu haqda unga qandaydir oʻt oʻchiruvchi aytgan. “Bir kuni, agar shamol toʻgʻri yoʻnalishda boʻlsa va yongʻin aynan kerakli joyda boshlansa, olov butun Los-Anjelesni okeangacha qamrab oladi va biz uni toʻxtata olmaymiz”, — degan ekan u.
9-yanvar, payshanba kuni Los-Anjelesda haqiqatan ham gumon qilinayotgan oʻt qoʻyuvchi qoʻlga olindi. Shahar tumanlaridan birining aholisi koʻchada, ularning soʻzlariga koʻra, alanga sochuvchi qurol bilan qurollangan shubhali odamni koʻrib qolishdi. Uni oʻzlari bogʻlab, keyin politsiya chaqirishdi.
Qoʻlga olingan shaxs 30 yoshli uysiz kishi boʻlib chiqdi. Uning yongʻin tarqalishiga aloqadorligi hozircha tasdiqlanmagan. Uning qoʻlida boʻlgan katta sariq rangli gaz ballonini alanga sochuvchi qurol deb oʻylashgan koʻrinadi.
Konspirologlarning fikricha, sugʻurtalovchilar yaqinlashib kelayotgan yongʻin haqida oldindan bilishgan
Boshqa mashhur fitna nazariyasiga koʻra, sugʻurta kompaniyalari Los-Anjelesda sodir boʻladigan yongʻinlardan oldindan xabardor boʻlishgan.
