Meta vertikal videolarni tahrirlash uchun yangi Edits ilovasini eʼlon qildi. Instagram rahbari Adam Mosserining aytishicha, iOS versiyasi kelgusi oyda chiqariladi, Android versiyasi esa keyinroq ishga tushiriladi. Biroq App Storeʼda boshqa reliz sanasi — 13-mart koʻrsatilgan.
Editsʼda koʻplab ijodiy vositalar, jumladan gʻoyalar va ilhom boʻlimlari, mashhur treklar roʻyxati va oʻrnatilgan kamera taqdim etiladi. Foydalanuvchilar qoralamalarini saqlab, doʻstlari yoki hammualiflari bilan ulashishlari mumkin.
Edits kamerasi yordamida Instagramga yuklash uchun 1080p aniqlikdagi 10 daqiqagacha boʻlgan videolarni suratga olish imkoniyati boʻladi. Shuningdek, ilova chop etilgan roliklar statistikasi va foydalanuvchilarni jalb qilish tahliliga kirish imkonini beradi.
Editsʼning ishga tushirilishi Xitoyning ByteDance kompaniyasiga tegishli raqobatchi xizmatlar - AQSHda TikTok va CapCutʼning vaqtinchalik toʻxtatilishi bilan bir vaqtga toʻgʻri keldi. Shunga qaramay, taqiq bir sutkadan kamroq davom etdi. Donald Trampning “TikTokʼni qaytarish” haqidagi bayonotidan soʻng, ilova hali raqamli doʻkonlarda paydo boʻlmagan boʻlsada, AQSHdagi foydalanuvchilarda yana ishlay boshladi.
