Oʻzbekiston va Xitoy oʻrtasida vizasiz rejim joriy yilning mart oyidan keyin joriy etilishi kutilmoqda. Bu haqda Uzbekistan Airways boshqaruvi raisining tijorat va turizm boʻyicha oʻrinbosari Shuhrat Yodgorov maʼlum qildi.
“Mart oyidan keyin mamlakatlarimiz oʻrtasida vizasiz rejim ochilishi kutilmoqda, bu Oʻzbekiston va Xitoy oʻrtasidagi yoʻlovchilar oqimini oʻn baravarga oshirishga xizmat qilishi kerak. Biz bu bozorda katta istiqbollarni koʻryapmiz”, — dedi Shuhrat Yodgorov.
Shu munosabat bilan aviakompaniya Toshkentdan Shenchjenga va Fargʻonadan Urumchiga yangi reyslarni yoʻlga qoʻyishni rejalashtirmoqda.
Eslatib oʻtamiz, oʻtgan yil oxirida Oʻzbekiston va Xitoy oʻzbekistonliklar uchun vizasiz rejim toʻgʻrisidagi bitimni imzolagan edi. Ushbu bitim Oʻzbekiston fuqarolariga 30 kun davomida vizasiz sayohat qilish imkonini beradi.
