Amerika Qoʻshma Shtatlari prezidenti Donald Tramp 4-fevral kuni AQSHning BMT Inson huquqlari boʻyicha kengashidan chiqishi toʻgʻrisidagi farmonni imzolashni rejalashtirmoqda. Bundan tashqari, u BMTning Falastin qochqinlariga yordam berish va ishlarni tashkil etish boʻyicha Yaqin Sharq agentligini (BAPOR) moliyalashtirishni taqiqlamoqchi.
Nashrning aniqlik kiritishicha, qaror Tramp Vashington shahrida Isroil bosh vaziri Binyamin Netanyaxu bilan uchrashuv oʻtkazishni rejalashtirgan kuni qabul qilinadi.
AQSH allaqachon BMTning Inson huquqlari boʻyicha kengashini Isroilga nisbatan notoʻgʻri munosabatda boʻlganlikda ayblab keladi. Politico tomonidan olingan axborot byulletenida Oq uy Kengash “oʻz vazifasini bajarmagani va inson huquqlarining dahshatli buzilishlarini sodir etayotgan mamlakatlarni himoya qilish uchun foydalanishda davom etayotganini” taʼkidlaydi.
Avvalroq Bayden maʼmuriyati agentlik xodimlarining 7-oktyabr kuni HAMASning Isroilga hujumiga aloqadorligi haqidagi xabarlardan soʻng BAPORni moliyalashtirishni toʻxtatgandi.
2018-yilda, Trampning avvalgi prezidentlik davrida AQSH ham BMT Inson huquqlari kengashidan chiqqanini eʼlon qilgan edi, biroq 2021-yilda Jo Bayden davrida ular unga qaytishdi.
21-yanvar kuni Tramp AQSHning Jahon sogʻliqni saqlash tashkilotidan (JSST) chiqishini eʼlon qildi. Trampning bunday rejalari uning inauguratsiyasidan oldin ham maʼlum qilingan.
OAV AQSH JSSTning eng yirik donori ekanligini va tashkilotdan chiqish uning uchun “halokatli” oqibatlarga olib kelishini, chunki u asosiy moliyalashtirish manbaidan mahrum boʻlishini eslatib oʻtdi.
Bundan tashqari, yanvar oyida Tramp AQSHning Parij bitimidan chiqishi toʻgʻrisidagi farmonni imzoladi. Bu qaror ikkinchi marta qabul qilindi: 2020-yil noyabr oyida AQSH Parij kelishuvidan chiqdi, ammo 2021-yilda Bayden bu qarorni bekor qildi.
