Oʻzbekiston Qurilish va uy-joy kommunal xoʻjaligi vazirligi Toshkentdagi koʻp qavatli uylarni boshqarish shaklini oʻzgartirishga majburlash haqidagi xabarlarga munosabat bildirdi. Soʻnggi oylarda poytaxtning turli tumanlaridan hokimliklar va huquq-tartibot idoralari tomonidan uylarni shirkatlardan boshqaruv kompaniyalariga oʻtkazishni talab qilayotgan bosimlar haqida shikoyatlar kelib tushmoqda. Shunga oʻxshash holat 2023-yilda ham kuzatilgan, biroq shahar hokimining tegishli qarori ochiq eʼlon qilinmagan.
Jurnalistlar va jamoatchilik faollarining qayd etishicha, bunday xatti-harakatlar “Koʻp kvartirali uylarni boshqarish toʻgʻrisida”gi qonunga ziddir. Hokimiyatning shirkat faoliyatiga aralashuviga yoʻl qoʻyilmaydi, boshqaruv shaklini majburiy oʻzgartirish esa faqat qarzdorlik yoki moliyaviy beqarorlik bilan bogʻliq muammolar yuzaga kelgan taqdirda mumkin boʻladi, bu prezidentning 2022-yildagi qarorida belgilangan.
Qurilish vazirligi uy-joy mulkdorlari shirkatlari faoliyatiga asossiz aralashish qonunchilikka muvofiq javobgarlikka sabab boʻlishi mumkinligini eslatdi. Shu bilan birga, vazirlik koʻp kvartirali uylarni boshqarish tizimini zamon talablari asosida takomillashtirish zarurligini taʼkidladi. Ularning fikricha, bu sohada allaqachon raqobat muhiti shakllangan, aholi oʻz uylarini boshqarishda va koʻrsatilayotgan xizmatlar sifatini nazorat qilishda faolroq ishtirok eta boshlagan.
Eslatib oʻtamiz, avvalroq Qurilish vazirligi Oʻzbekistonda ijara toʻlovining eng kam miqdorlarini belgilagandi. Kvartira toʻlovi miqdori uyning qavatliligiga, shuningdek, tumanga bogʻliq. Masalan, Toshkent shahrida kommunikatsiyasi bor ikki qavatli uylar uchun tariflar 1 kvadrat metr uchun 1147-1149 soʻmni tashkil etadi.
