Oliy Majlis Senati raisi Yevropa Ittifoqining Oʻzbekistondagi elchisi bilan uchrashdi Oliy Majlis Senati Raisi Tanzila Narbayeva 12-fevral kuni Yevropa Ittifoqining Oʻzbekistondagi elchisi Toyvo Klaar bilan uchrashuv oʻtkazdi.
Suhbat chogʻida tomonlar Oʻzbekistonning Yevropa Ittifoqiga aʼzo davlatlar bilan hamkorligi rivojlanishning yangi bosqichiga koʻtarilganini taʼkidladilar. GSP+ tizimi doirasida savdo, iqtisodiyot, taʼlim, tibbiyot va innovatsiya sohalarida hamkorlikni kengaytirish istiqbollari muhokama qilindi.
Inson huquqlarini himoya qilish, gender tenglikni taʼminlash va fuqarolik institutlarini faol jalb qilish masalalariga alohida eʼtibor qaratildi. Shuningdek, ushbu sohalarda rivojlangan davlatlar tajribasini qoʻllash yuzasidan fikr almashildi.
Bundan tashqari, YI bilan parlamentlararo hamkorlikni rivojlantirish, shuningdek, qonunchilik jarayoni va parlament nazoratini takomillashtirishga qaratilgan dasturlarni ishga tushirishga kelishib olindi.
Eslatib oʻtamiz, avvalroq Yevropa kengashi prezidenti Antoniu Koshta 2025-yilda YI va Oʻzbekiston oʻrtasida sheriklik toʻgʻrisidagi bitimni imzolash rejalashtirilayotganini maʼlum qilgandi. Yevropa Ittifoqi Prezidenti Samarqandda oʻtkaziladigan “Markaziy Osiyo — Yevropa Ittifoqi” sammitiga tayyorgarlik koʻrilgani uchun minnatdorlik bildirdi.
