Oʻzbekistonda raqamli texnologiyalarni keng joriy etish doirasida istiqbolli sportchilarni izlash, tanlash va tayyorlash boʻyicha innovatsion platforma yaratiladi. Yangi tizim iqtidorli yoshlarni maktab taʼlimi bosqichidayoq aniqlash, keyinchalik ularning kasbiy darajasigacha boʻlgan rivojlanishini kuzatib borish imkonini beradi, deb yozdi prezident matbuot kotibi Sherzod Asadov.
Oʻrta maktablar negizida oʻquvchilarning sportga boʻlgan qobiliyatlarini qayd etish va maʼlumotlarni elektron platformaga kiritish boshlanadi. Sport maktablari yosh sportchilarni obyektiv koʻrsatkichlar asosida tanlab, keyinchalik jismoniy va ruhiy tayyorgarligini taʼminlaydi.
Bundan tashqari, tizimda sportchilarning kundalik yutuqlari eʼlon qilinadi, bu esa ularning taraqqiyoti shaffofligini taʼminlaydi.
Shuningdek, sport federatsiyalari milliy terma jamoalar yigʻinlariga taklif qilish orqali eng yaxshi yosh futbolchilar haqidagi maʼlumotlarga ega boʻladi. Buning uchun sportchilarning jismoniy koʻrsatkichlarini raqamli monitoring qilish tizimi yaratiladi.
Yana bir muhim yangilik — maʼlumotlar onlayn tarzda xorijiy va soha mutaxassislariga uzatiladi. Bu sportchilarni tayyorlash boʻyicha professional tavsiyalar olish imkoniyatini yaratadi.
Shuningdek, platformada ruxsat etilgan va taqiqlangan tibbiy preparatlar toʻgʻrisidagi maʼlumotlar joylashtiriladi. Bu sportchilarga dorilarni qabul qilishda xatolarga yoʻl qoʻymaslik va doping holatlarining oldini olishga yordam beradi.
Bundan tashqari, tizim nafaqat sportchilarning natijalarini baholash, balki ularning murabbiylari ishining samaradorligini ham tahlil qilish imkonini beradi.
Yangi raqamli platforma sportchilarning tayyorgarlik darajasini oshirishi, saralash jarayonini yanada shaffof va adolatli qilishi kutilmoqda.
Avvalroq Oʻzbekistonda parasportchilarni tayyorlash va saralash tizimi soddalashtirilishi haqida xabar berilgandi. A. I. Gersen nomidagi universitetning Toshkent filialida moslashuvchan sport fakultetini ochish rejalashtirilmoqda. Bundan tashqari, imkoniyati cheklangan sportchilar sport normativlarini bajarishdagi natijalariga koʻra saralab olinadi.
