Ijtimoiy tarmoqlarda Kogon — Buxoro yoʻli boʻylab qulagan daraxtlar aks etgan video tarqaldi. Mahalliy aholi ularning koʻchirib oʻtkazilganidan norozi boʻlib, yashil maydonlarni saqlab qolishni soʻramoqda. Kun.uz tahririyatiga ham murojaatlar kelib tushgan.
“Kesilgan daraxtlar yonidan o‘tayotganimizda yonimizda sayyohlar ham bor edi. Ular bu holdan shokka tushishdi. Buxoroda o‘zi daraxt deyarli yo‘q. Borini ham yo‘q qilishyapti”, — deydi shaharliklar. Ularning soʻzlariga koʻra, daraxtlar yoʻlni kengaytirish uchun olib tashlanmoqda.
Ekologiya boshqarmasining tushuntirishicha, daraxtlarni koʻchirib oʻtkazish Vazirlar Mahkamasining 2022-yil 22-avgustdagi 464-sonli qaroriga asosan A-380 avtomobil yoʻlini taʼmirlash doirasida amalga oshirilmoqda. Idora maʼlumotlariga koʻra, 151 tup daraxt allaqachon “Boqiy Buxoro” majmuasi va “Yangi Oʻzbekiston” bogʻiga koʻchirilgan, qolganlari esa boʻsh hududlarga oʻtkaziladi.
Viloyat ekologiya boshqarmasi matbuot kotibi Marjona Shukurovaning maʼlum qilishicha, koʻchirib oʻtkazilayotgan daraxtlar 15-17 yoshda boʻlib, ishlar davom etmoqda. Biroq, koʻchat oʻtqazishni amalga oshirayotgan kompaniyaning professionalligi, boʻlajak yashil hududlarning aniq joylashuvi va daraxtlarning keyingi taqdiri haqidagi savollar hozircha javobsiz qolmoqda.
