2025-yilning 28-fevralidan 6-martiga qadar Oʻzbekiston U18 terma jamoasi ilk bor III B divizionida - yettinchi oʻrinda jahon chempionatida ishtirok etadi. Turnir Bangkokda (Tailand) boʻlib oʻtadi.
Bungacha Oʻzbekiston xokkey maktablari tarbiyalanuvchilaridan tuzilgan jamoa ikki marta Osiyo va Okeaniya U18 kubogini qoʻlga kiritib, biror marta ham magʻlubiyatga uchramagan edi. Gʻalabalar 2023-yilda Ulan-Batorda, 2024-yilda Toshkent va Samarqandda qoʻlga kiritilgan.
Oʻzbekiston oʻsmirlari debyut jahon chempionatida JAR, Lyuksemburg, Turkmaniston, Bosniya va Gersegovina hamda Tailand jamoalariga qarshi bahs olib boradi.
Oʻzbekiston terma jamoasining oʻyinlar jadvali:
28-fevral, 14:30 — JARga qarshi
1-mart, 14:30 — Lyuksemburgga qarshi
3-mart, 14:30 — Turkmanistonga qarshi
4-mart, 11:00 — Bosniya va Gersegovinaga qarshi
6-mart, 18:00 — Tailandga qarshi
JAR terma jamoasi turnir autsayderi hisoblanadi, Lyuksemburg oʻtgan oʻyinni oʻtkazib yubordi, Turkmaniston, Bosniya va Gersegovina hamda Tailand jamoalari esa oʻzbekistonlik xokkeychilar uchun jiddiy raqib boʻlishi mumkin.
Eslatib oʻtamiz, 2024-yil sentyabr oyida Oʻzbekiston prezidenti ishtirokidagi selektor yigʻilishida ommaviy sportni kengaytirish va 2028-yilda Los-Anjelesda boʻlib oʻtadigan Olimpiadaga tayyorgarlik koʻrish boʻyicha rejalar koʻrib chiqilgandi. Yengil atletika va suv sporti turlari, shuningdek, qishki sport turlari, ayniqsa, xokkey boʻyicha foydalanilmagan imkoniyatlarga alohida eʼtibor qaratildi.
