Fransiyaning Orano davlat atom kompaniyasi uran narxining oshishi fonida turli mamlakatlarda uran qazib olish loyihalarini qayta tiklashni rejalashtirmoqda. Kompaniya bosh direktori Nikolya Maening Bloombergʻga bergan intervyusida maʼlum qilishicha, bozordagi vaziyatning yaxshilanishi va geosiyosiy keskinlikning pasayishi faoliyatni faollashtirishga yordam beradi.
Orano 2012-yilda toʻxtatilgan Namibiyadagi uran loyihasiga qaytish, shuningdek, Kanada va Oʻzbekistonda geologik qidiruv ishlarini davom ettirish niyatida.
2022-yilda kompaniya “Navoiyuran” va Oʻzbekiston Davlat ekologiya qoʻmitasi bilan mamlakatda uran qidirish va qazib olish boʻyicha qoʻshma korxona tashkil etish toʻgʻrisida shartnoma tuzgan.
Avvalroq Oʻzbekiston yadroviy chiqindilarni boshqarish strategiyasi loyihasini ishlab chiqqani va uzoq muddatli yoqilgʻi taʼminoti uchun mahalliy urandan foydalanishni rejalashtirayotgani haqida xabar berilgandi. Kichik quvvatli atom stansiyasi qurilishi MAGATE ekspertlari tavsiyalarini hisobga olgan holda davom etmoqda, birinchi blokni ishga tushirish esa besh yildan keyin rejalashtirilgan.
