Kosta-Rika hukumati Qoʻshma Shtatlar bilan chegarani noqonuniy kesib oʻtgan Markaziy Osiyo va Hindistonning AQSHdan deportatsiya qilingan 200 nafar fuqarosini qabul qilishga rozi boʻldi, deb yozadi New York Times.
Kosta-Rika prezidenti Rodrigo Chavesning soʻzlariga koʻra, deportatsiya qilinganlar orasida Oʻzbekiston, Qirgʻiziston va Qozogʻiston fuqarolari bor. Uning soʻzlariga koʻra, kelganlar olti haftagacha migrantlarni saqlash markazida boʻladi, shundan soʻng ular vataniga qaytariladi. Ularga muassasa hududini tark etish taqiqlanadi.
Deportatsiya qilinganlarni vataniga qaytarish jarayoni toʻliq AQSH hukumati tomonidan moliyalashtiriladi va BMT huzuridagi Xalqaro migratsiya tashkiloti nazorati ostida amalga oshiriladi, deya taʼkidladi Kosta-Rika prezidenti maʼmuriyati.
NBC News maʼlumotlariga koʻra, AQSHdan Kosta-Rikaga birinchi deportatsiya reysi payshanba kuni uchib ketgan va mamlakatga kunning ikkinchi yarmida yetib kelishi kutilmoqda. Telekanal maʼlumotlariga koʻra, samolyot bortida 135 nafar noqonuniy muhojir bor. Ularning deyarli yarmi voyaga yetmaganlardir. Quvgʻin qilinganlar orasida kamida ikki nafar homilador ayol bor.
Kosta-Rika ichki ishlar vaziri oʻrinbosari Omer Badillaning aniqlik kiritishicha, ushbu reys bilan Tojikiston, Vetnam, Gruziya va Ozarbayjondan ham muhojirlar olib kelinmoqda. Uning soʻzlariga koʻra, deportatsiya qilinganlarning shaxsiy holatlari “toʻliq oʻrganiladi”, ularning hayotiga oʻz vatanlarida xavf yoʻqligiga ishonch hosil qilinadi. Baʼzilar Kosta-Rikada qochqin maqomini soʻrashlari mumkin.
Oʻtgan hafta AQSHdan deportatsiya reyslarini Panama ham qabul qildi. Mamlakatga uchta samolyotda Markaziy Osiyo, Yaqin Sharq va Afrikadan noqonuniy muhojirlar yuborilgan.
