Nasos stansiyalari va energetika boshqarmasi tomonidan e’lon qilingan Amu-Surxon irrigatsiya tizimlari havza boshqarmasining nasos stansiyalari va energetika uskunalarini kapital ta’mirlash bo‘yicha o‘tkazilgan tenderda “MATOR TAMIR” MCHJ g‘olib deb topildi. Bu haqda Telegramdagi “Revizor” kanali yozmoqda.
Kompaniya eng past narxni taklif qildi — 169,9 mln so‘m, bu esa unga birinchi o‘rinni egallash imkonini berdi. Qiymati bo‘yicha ikkinchi bo‘lib “VERFOKUS” MCHJ taklifi bo‘ldi — 170 mln so‘m.
Statistika agentligi ma’lumotlariga ko‘ra, “MATOR TAMIR” MCHJ hozirda “faoliyat yuritmayapti”.
Telegram kanal muallifi “MATOR TAMIR” va “VERFOKUS LLC” o‘rtasidagi bog‘liqlikni boshqa tenderda g‘olibni tanlash misolida ko‘rib chiqdi.
15 fevral kuni Amu-Surxon irrigatsiya tizimlari havza boshqarmasining nasos stansiyalari va energetika boshqarmasi ham nasos uskunalarini kapital ta’mirlash bo‘yicha tender e’lon qilgandi. Boshlang‘ich bahosi — 350 mln so‘m.
Tender natijalariga ko‘ra, eng past narx — 349,9 mln so‘m taklif etgan "VERFOKUS" MCHJ g‘olib deb topildi. “ELEREM MOTOR TAMIR” MCHJ esa ikkinchi o‘rinni egalladi.
“VERFOKUS” MCHJ rahbari va yagona ta’sischisi Ikromjon Ibragimovich Ovchiyev hisoblanadi. Shuningdek, u Farg‘ona viloyati, Buvayda tumani, Tarrachi qishlog‘i, Gul Diyor ko‘chasi, 866-uy manzilida faoliyat yuritayotgan “THOUSAND TRADE” va “SIRIUS 7777” MCHJlar rahbari va ta’sischisi hisoblanadi.
Qizig‘i, xuddi shu manzilda avvalgi tenderda qatnashib, g‘olib bo‘lgan MATOR TAMIR MCHJ joylashgan.
Bundan tashqari, “ELEREM MATOR TAMIR” MCHJning 100 foiz aksiyasiga egalik qiluvchi Usmonova Ximilaxon Jumaqo‘ziyevna “MATOR TAMIR” MCHJ rahbari va yagona ta’sischisi Usmonov Zafar Umarovichning qarindoshi bo‘lishi mumkin.
