Sun’iy intellekt xavf-xatarlarni tahlil qilish tizimiga ulanadi. Mazkur loyiha Jahon banki ekspertlari ishtirokida amalga oshirilmoqda. Uning doirasida muayyan kompaniyaning ishonchlilik darajasi 122 ta mezon — moliyaviy barqarorlik, soliq qarzdorligi, savdo tarixi va boshqalar bo‘yicha avtomatik tarzda baholanadi.
Respublikaga yetkazib berilayotgan mahsulotlarni ko‘zdan kechirishda ham zamonaviy texnologiyalar qo‘llanila boshlanadi. Sun’iy intellekt tovarlarning rentgen tasvirlarini tahlil qiladi va xulosalarni bojxona xodimlariga yetkazadi.
Ushbu qarorlar ma’lumotlarni qayta ishlash tezligini va bojxona punktlarining o‘tkazuvchanlik qobiliyatini oshirishga qaratilgan. Chunki import va eksport hajmi, sayyohlar soni yil sayin ortib bormoqda. Tovarlarni bojxona hududida qayta ishlash imkoniyatlari kengaytirilgani, buning natijasida bunday mahsulotlarning O‘zbekiston eksportidagi ulushi 1 milliard dollardan oshgani ta’kidlandi. Ammo joriy yilda rejimning soddalashtirilishi munosabati bilan rasmiylar ko‘rsatkichni 1,5 milliard dollargacha oshirishni rejalashtirmoqda.
Shuningdek, yo‘lovchilar oqimi va chegara orqali avtomobillar harakati ikki baravar ko‘payishi kutilmoqda, bu esa qo‘shimcha infratuzilma yaratish va yangi texnologiyalardan foydalanishni talab qiladi. Avtobus qatnovlari yo‘lovchilari to‘g‘risidagi ma’lumotlarni aviatashuvlarga o‘xshash tarzda oldindan olish tizimini joriy etish rejalashtirilmoqda. Eng yirik postlarda yengil avtomobillar va avtobuslar uchun "qizil" va "yashil" yo‘laklarni tashkil etish tajribasi sinov tariqasida yo‘lga qo‘yiladi.
Mirziyoyev bildirilgan tashabbuslarni qo‘llab-quvvatladi, shuningdek, respublikaning ushbu tuzilmaga a’zo bo‘lish jarayoni doirasida bojxona qonunchiligini Jahon savdo tashkiloti talablariga to‘liq muvofiqlashtirish bo‘yicha topshiriq berdi.
Taqdimotda mutasaddilar bajarilgan ishlar yuzasidan hisobot berdi. Xususan, 10 ga yaqin davlatlar bilan ma’lumotlar almashinuvi yo‘lga qo‘yildi, bojxona rasmiylashtiruvi va ma’lumotlarni qayta ishlash markazlari tashkil etildi. To‘rtta yirik postda terminallar qurilib, tadbirkorlar uchun qulaylik yaratilgani natijasida eksport jarayoni 9 bosqichdan 3 bosqichga qisqardi.
Natijada chegarani kesib o‘tayotgan transport vositalari soni so‘nggi bir yilda 8 barobarga oshib, salkam 5 mln. Mamlakat byudjetiga tushumlar 9 barobarga oshib, 63 trillion so‘mlik ko‘rsatkichdan oshdi.
Yuklarni rasmiylashtirish vaqti import uchun 3 soatgacha, eksport uchun 20 daqiqagacha qisqardi. O‘zgarishlar O‘zbekistonga xalqaro logistika reytingining bojxona toifasida 140-o‘rindan 74-o‘ringa ko‘tarilish imkonini berdi.
