O‘zbekiston va Pokiston strategik sheriklikni mustahkamlamoqda

O‘zbekiston

Shavkat Mirziyoyev va Shahboz Sharif savdo, transport jihatidan o‘zaro bog‘liqlikni rivojlantirish va muhim tarmoqlardagi hamkorlik masalalarini muhokama qildi. Tovar ayirboshlashni 2 mlrd dollarga yetkazish, qo‘shma transport-logistika kompaniyasini tashkil etish va Transafg‘on temiryo‘li bo‘yicha ishlarni davom ettirishga kelishib olindi.

Foto: Prezident matbuot xizmati

O‘zbekiston prezidenti Shavkat Mirziyoyev Toshkentga kelgan Pokiston bosh vaziri Shahboz Sharif bilan muzokara o‘tkazdi. Yetakchilar mamlakatlar o‘rtasidagi strategik sheriklikni kengaytirish, jumladan, o‘zaro savdoni ko‘paytirish, turli tarmoqlarda kooperatsiya qilish va transport aloqalarini rivojlantirish masalalarini muhokama qildilar.

2023-yilda O‘zbekiston va Pokiston o‘rtasidagi tovar ayirboshlash hajmi 400 million dollardan oshdi, qo‘shma korxonalar soni 130 taga yetdi. Karachi va Toshkentda savdo uylari ochildi, noyabr oyidan boshlab Toshkent va Lahor o‘rtasida muntazam aviaqatnovlar tiklandi.

Tomonlar imtiyozli savdo to‘g‘risidagi bitim doirasida tovarlar nomenklaturasini kengaytirish orqali o‘zaro savdoni 2 milliard dollarga yetkazishni maqsad qilgan. Bojxona tartib-taomillarini soddalashtirish, standartlar va texnik reglamentlarni yaqinlashtirish, elektron marketpleyslarni integratsiya qilish va banklararo hisob-kitoblarni yaxshilash bu yo‘ldagi muhim qadamlar bo‘ladi.

Farmatsevtika, elektrotexnika, qishloq xo‘jaligi mashinasozligi, geologiya, agrosanoat, to‘qimachilik va charm tarmoqlarida qo‘shma loyihalarni amalga oshirish masalalari ham muhokama qilindi.

Transport aloqalarini rivojlantirishga alohida e’tibor qaratildi: so‘nggi yillarda O‘zbekiston–Afg‘oniston–Pokiston yo‘nalishi bo‘yicha yuk tashish hajmi besh barobar oshdi. Tovar ayirboshlash hajmini yanada oshirish uchun qo‘shma transport-logistika kompaniyasi tashkil etiladi, Transafg‘on temir yo‘lini qurish ishlari davom ettiriladi.

Hukumatlararo komissiyaning navbatdagi yig‘ilishi iyul oyida Lahor shahrida bo‘lib o‘tadi. Bundan tashqari, yetakchilar 2026-yilda birinchi yig‘ilishini o‘tkazadigan Strategik sheriklik oliy kengashini tuzishga kelishib oldilar.

Muhim yangiliklarni oʻtkazib yubormang!

Asosiy voqealardan birinchi boʻlib xabar topish uchun Telegram kanalimizga obuna boʻling.