O‘zbekistonda Savdo-sanoat palatasi huzurida Tadbirkor ayollar kengashi tashkil etiladi. Bu haqda prezident xotin-qizlarni 8-mart - Xalqaro xotin-qizlar kuni bilan tabriklagan nutqida ma’lum qildi.
Kengash tadbirkor ayollar uchun eng muhim bo‘lgan masalalarni Oliy Majlisga olib chiqadi. Savdo-sanoat palatasi rahbari o‘rinbosari lavozimiga Nodira Shotursunova taklif qilindi. Tijorat banklaridan ayollar uchun moliyaviy paketlar ham paydo bo‘ladi.
2025-yilda ular hisobidan 2 million nafar xotin-qizning bandligi ta’minlanadi, jumladan, ularning 1,3 million nafari tadbirkorlikka jalb etiladi. Xotin-qizlar biznesi loyihalarini amalga oshirish uchun jami qo‘shimcha 3,3 trln so‘m yo‘naltirish rejalashtirilgan.
Shundan 100 mln dollari oilaviy tadbirkorlikka, yana 100 mln dollari banklarning o‘zlari tomonidan jalb qilinadi. Shuningdek, "Hamroh" kompaniyasiga 100 mln dollar yo‘naltiriladi. Milliy bank kamida 200 ming ayolga xizmatlar sohasidagi loyihalarni amalga oshirishda yordam beradi, "Turonbank" esa kamida 150 ming ayolga limon yetishtirish uchun imtiyozli kreditlar ajratadi.
Bundan tashqari, quyidagilarni qo‘llab-quvvatlash rejalashtirilgan:
160 ming nafar xotin-qizlar - parrandachilik loyihalarida ("Mikrokreditbank");
160 ming nafar xotin-qizlar - sabzavot va ko‘chat yetishtirishda ("O‘zsanoatqurilishbank");
150 ming - uzum, karam va brokkoli yetishtirishda (Xalq banki);
144 ming - bog‘dorchilikda ("Agrobank");
94 ming - ko‘katlar, bulg‘or qalampiri, baqlajon va pomidor yetishtirishda (Biznesni rivojlantirish banki);
82 mingtasi - farmatsevtika va uzumchilikda ("Asakabank");
IT, asalarichilik va mevachilik sohalarida - 58 mingta ("Aloqabank").
Banklar o‘zini o‘zi band qilganlarga 50 mln so‘mgacha garovsiz kreditlar ajratadi. Tadbirkor ayol ikki baravar ko‘p - 100 million so‘mgacha yangi kredit olishi mumkin. Markaziy bank va kredit tashkilotlariga ikki oy muddatda ayollar uchun bank xizmatlarini yo‘lga qo‘yish topshirildi.
