2025-yil 25-fevraldan boshlab O‘zbekiston va Turkmaniston o‘rtasida erkin savdo rejimi kuchga kirdi. Bu yangilik Investitsiyalar, sanoat va savdo vazirligi tomonidan e’lon qilindi.
Bundan buyon ikki mamlakat hududida ishlab chiqarilgan aksariyat tovarlar bojxona to‘lovlaridan ozod etildi. Bu esa biznes va savdo-iqtisodiy hamkorlikni kengaytirish uchun yangi imkoniyatlar yaratadi.
Mazkur bayonnoma O‘zbekiston prezidentining 2025-yil 27-yanvardagi PQ-29-sonli qarori bilan tasdiqlangan. 2024-yilda mamlakatlar o‘rtasidagi tovar aylanmasi 1,14 milliard dollarni tashkil etib, o‘tgan yilga nisbatan 5,5 foizga o‘sdi. Yangi savdo rejimi o‘zaro mahsulot yetkazib berishni soddalashtirish orqali ushbu o‘sishni yanada tezlashtirishga qaratilgan.
Erkin savdo rejimining joriy etilishi eksport-import tartib-qoidalarini soddalashtiradi, tadbirkorlar xarajatlarini kamaytiradi hamda sanoat hamkorligi uchun yangi imkoniyatlar yaratadi. O‘zbekiston Investitsiyalar, sanoat va savdo vazirligi boshqa idoralar bilan hamkorlikda yangi savdo shartlaridan samarali foydalanishni ta’minlash mexanizmini ishga tushirdi.
Endi o‘zbekistonlik ishlab chiqaruvchilar Turkmaniston bozoriga yanada faolroq kira oladilar, pasaytirilgan bojxona to‘lovlari esa mahalliy mahsulotlarning raqobatbardoshligini oshiradi.
