Ijtimoiy tarmoqlarda shifokorlar bemor ayolni uy kiraverishida qoldirib ketganini ko‘rsatuvchi video tarqaldi. Respublika shoshilinch tibbiy yordam ilmiy markazi voqea tafsilotlarini tushuntirdi.
Xabarlarga ko‘ra, ayolni to‘rt soat davomida turli shifoxonalarga olib borishgan, so‘ngra: “Baribir o‘ladi, hech kim qabul qilmaydi”, deb aytishgan. Muayyan yashash joyiga ega bo‘lmagan 72 yoshli M.B. tez tibbiy yordamga bir necha bor murojaat qilgan. Tez yordam brigadalari fuqaroni 4 va 1-sonli shahar klinik shifoxonalariga olib borgan.
6-mart kuni soat 10:00 dan 20:00 gacha uning nomiga to‘rtta chaqiruv qayd etilgan. Ayol shoshilinch tibbiy yordamga muhtoj bo‘lmagani va aniq yashash joyiga ega emasligi sababli, uni chaqiruv kelgan manzillarga qaytarib olib borishgan. Tez yordamni turli odamlar, shu jumladan huquq-tartibot xodimlari ham chaqirgan.
So‘nggi chaqiruvdan keyin fuqaroni yana 1-sonli shifoxonaga olib borishgan va unga “o‘ng ko‘krak bezining yiringli jarohati” tashxisi qo‘yilgan.
Hozirda M.B. Respublika ixtisoslashtirilgan onkologiya va radiologiya ilmiy-amaliy tibbiyot markazi Toshkent shahar filialida davolanmoqda.
