Shavkat Mirziyoyev Tojikiston prezidenti Imomali Rahmonning taklifiga binoan 31-mart kuni amaliy tashrif bilan Xoʻjand shahrida boʻladi. Prezident matbuot xizmati tashrif tafsilotlarini maʼlum qildi.
Tashrif dasturining asosiy bandi Oʻzbekiston, Tojikiston va Qirgʻiziston yetakchilarining qoʻshma uchrashuvi hamda ikki tomonlama muzokaralar oʻtkazishdan iborat boʻladi.
Shuningdek, kun tartibidan mamlakatlarimiz oʻrtasidagi doʻstlik, yaxshi qoʻshnichilik va strategik sheriklik munosabatlarini yanada mustahkamlash, savdo-iqtisodiy va madaniy-gumanitar hamkorlikni kengaytirish masalalari oʻrin olgan.
Tadbir yakunida uch mamlakat yetakchilari Oʻzbekiston, Tojikiston va Qirgʻiziston davlat chegaralarining tutash nuqtasi toʻgʻrisidagi shartnomani imzolaydilar. Shuningdek, davlat rahbarlari sanʼat ustalarining qoʻshma konsertida ishtirok etadilar.
