Aprel oyining boshida oʻzbekistonliklarni faqat quruq va iliq ob-havo kutmoqda. Oʻzgidromet sinoptiklari haftalik ob-havo maʼlumotini taqdim etdi.
1-2-aprel kunlari harorat kunduzi 22-27 daraja boʻladi, ish haftasining oxiriga kelib havo 28-30 darajagacha, janubda va choʻl hududlarda 33 darajagacha isiydi. Bu aprel oyi boshidagi meʼyoriy qiymatlardan 5-7 darajaga yuqori.
Qoraqalpogʻiston Respublikasi va Xorazm viloyatida 1-3-aprelda quruq va juda iliq ob-havo boʻlishi kutilmoqda, kunduzgi harorat 25-30 daraja, 4-aprelda harorat 5-7 darajaga pasayadi, baʼzi joylarda yomgʻir yogʻishi mumkin. Shamol sharqdan 7-12 m/s tezlikda esadi, baʼzi joylarda 15-20 m/s gacha kuchayishi mumkin.
1-aprel kuni Toshkentda havo biroz bulutli boʻladi, vaqti-vaqti bilan oʻzgarib turadi, yogʻingarchilik kutilmaydi. Harorat kechasi 10-15°, kunduzi 1-2-aprelda 24-26°, 3-4-aprelda 26-29° boʻladi.
