JSST rahbari Tedros Gebreyesus jahon hamjamiyatini pandemiyalarning oldini olish boʻyicha kelishuv ustidagi ishlarni faollashtirishga chaqirdi. TASS nashri uning soʻzlarini keltirmoqda.
JSSTga aʼzo davlatlar elchilari oldida u koronavirus pandemiyasi hozirgi mojarolar, geosiyosiy va iqtisodiy larzalar fonida “uzoq xotira” boʻlib tuyulayotganini aytdi.
Ammo keyingi pandemiya hammasi tinchlanishini kutib turmaydi. U 20 yil yoki undan koʻproq vaqtdan keyin sodir boʻlishi yoki ertaga sodir boʻlishi mumkin. Biz tayyor boʻlishimiz kerak. Shuning uchun ham dunyo JSSTning pandemiya boʻyicha kelishuvini yakuniga yetkazish uchun sizning ishtirokingiz va yetakchiligingizga muhtoj, — dedi Gebreyesus.
Uning soʻzlariga koʻra, sogʻliqni saqlash sohasida global xavfsizlikka erishish uchun muvofiqlashtirilgan saʼy-harakatlar va tahdidlarga umumiy yondashuv talab etiladi.
Muzokaralar ishtirokchilari biz jahon hamjamiyati sifatida olgan ogʻriqli saboqlarga asoslanadigan va ayni paytda aʼzo davlatlarning turli ehtiyojlari va ustuvorliklarini muvozanatlashtiradigan bitimni ishlab chiqish uchun uch yildan ortiq vaqt davomida qattiq mehnat qildilar. Konsensus tomon harakat qilishga tayyorsiz, deb oʻylayman, — deya xulosa qildi JSST rahbari.
