Texnik jihatdan tartibga solish sohasida nazorat inspeksiyasi Leapmotor elektromobillarini sertifikatlashni toʻxtatish tafsilotlarini maʼlum qildi.
Maʼlum boʻlishicha, C16 rusumli avtomobil laboratoriya sharoitida sinovdan oʻtkazilgan. Natijalar shuni koʻrsatdiki, u xalqaro standartlarga, xususan, BMT tomonidan belgilangan xavfsizlik talablariga javob bermaydi (ruxsat etilgan meʼyordan 16 baravar yuqori).
Nomuvofiqlik “Oʻzbekiston ilmiy-sinov va sifat nazorati markazi” davlat muassasasi sinov laboratoriyasi tomonidan UzTR.237-016:2017, 3-ilova, 44-band — “Tashqi elektromagnit nurlanishga chidamlilik (keng polosali elektromagnit shovqinlar) ” standarti boʻyicha aniqlandi.
Elektromagnit moslik elektron qurilmalar va tizimlar oʻrtasidagi elektromagnit maydonlar taʼsirini minimallashtirishga qaratilgan testdir. Bunday testlar transport vositalari uchun ham zarur, chunki elektromagnit taʼsir avtomobil elektron tizimlarining ishlashiga jiddiy taʼsir koʻrsatishi mumkin, bu esa xavfsizlikka tahdid soladi.
Bundan tashqari, elektromagnit nurlanishning inson salomatligiga taʼsiri ham muhim masala hisoblanadi. Tadqiqotlarga koʻra, elektromagnit maydonlarning yuqori darajasi organizmga, jumladan, asab tizimiga, yurak-qon tomir tizimiga salbiy taʼsir koʻrsatishi va hatto saraton kasalliklarining paydo boʻlish xavfini oshirishi mumkin.
Oʻzbekiston fuqarolaridan avtomobil tanlashda xalqaro talablar va standartlarga javob beradigan mahsulotlarga ustunlik berish, shuningdek, xavfsizlik meʼyorlariga rioya qiladigan rasmiy dilerlarga murojaat qilish soʻralgan. Shu bilan birga, ushbu kompaniyaning avtomobillari savdosi davom etmoqda.
