Toshkentda avtobuslarda chiptasiz yurish holatlari koʻpaygani sababli reydlar boshlandi. Transport nazorati inspeksiyasi yoʻlovchilarni ogohlantirdi.
1-yanvardan boshlab poytaxtda jamoat transportida yoʻl haqini naqd pulda toʻlashdan voz kechildi. Yoʻlovchilar yoʻl haqini elektron shaklda yoki bir martalik QR-chiptalar orqali toʻlashlari mumkin.
Ayrim fuqarolar yoʻl haqini toʻlamasdan avtobusdan chiqib ketmoqda. Shu munosabat bilan mutaxassislar tomonidan Toshkent shahri boʻylab harakatlanuvchi avtobuslarda reyd tadbirlari oʻtkazilmoqda.
Yoʻlkira haqini bir martalik QR-chiptalar orqali toʻlayotgan yoʻlovchilardan chiptalarni butun safar davomida yonida olib yurish va nazoratchi hamda inspektorlarning talabiga koʻra koʻrsatish soʻralgan.
Shahar yoki shahar atrofiga qatnaydigan avtobusda chiptasiz yurish Maʼmuriy javobgarlik toʻgʻrisidagi kodeksning 144-moddasi bilan jazolanadi. BHMning 1/10 qismi (37,5 ming soʻm) miqdorida jarima koʻzda tutilgan.
