Oʻzbekiston Germaniyada mahalliy oliy oʻquv yurtlari diplomlarini tan olish boʻyicha kelishuvga erishishni rejalashtirmoqda. Investitsiyalar vazirligi rahbari oʻrinbosari Shohrux Gʻulomov Germaniyaning taʼlim va migratsiya sohasi mutaxassislari delegatsiyasini qabul qildi.
Unda GFR hududiy savdo-sanoat palatalari direktorlari, shuningdek, GP Günter Papenburg tuzilmasiga kiruvchi investitsiya kompaniyalari rahbarlari ishtirok etdi.Uchrashuvda oʻzbekistonlik yoshlarni ilgʻor texnologiyalarga birgalikda oʻqitish va ularni Germaniyada ishga joylashtirishni nazarda tutuvchi tashabbuslarni amalga oshirish muhokama qilindi.
Oʻz navbatida, germaniyalik mutaxassislarga Oʻzbekistonda ishlash uchun imtiyozlar berish taklif qilinmoqda. Shuningdek, tomonlar Germaniyada Oʻzbekiston diplomlarining tan olinishi mavzusiga toʻxtaldi. Buning uchun respublikadagi oliy oʻquv yurtlari va kasb-hunar kollejlarini GFR taʼlim vazirligining ANABIN axborot bazasiga kiritish rejalashtirilgan.
