3-aprel kuni Markaziy Osiyo—Yevropa Ittifoqi birinchi sammitining Ishbilarmonlik dasturi boshlandi. Shavkat Mirziyoyev Yevropa tiklanish va taraqqiyot banki prezidenti Odil Reno-Basso hamda Yevropa komissiyasi rahbari Ursula fon der Lyayen bilan uchrashuv oʻtkazdi. Davlat rahbari matbuot xizmati uchrashuvlar tafsilotlarini eʼlon qilmoqda.
Yevropa tiklanish va taraqqiyot banki prezidenti Odil Reno-Basso bilan mamlakatimizning ushbu nufuzli xalqaro moliyaviy institut bilan keng koʻlamli hamkorligini yanada rivojlantirishning amaliy jihatlari batafsil koʻrib chiqildi.
Oʻzbekiston va YTTB oʻrtasidagi strategik sheriklik munosabatlarida yuksak darajaga erishilgani katta mamnuniyat bilan qayd etildi. Ustuvor tarmoqlardagi qoʻshma loyihalar portfeli barqaror oshib bormoqda. Bankning Oʻzbekiston iqtisodiyotiga kiritgan umumiy investitsiyalari 5 milliard yevrodan oshdi, shu jumladan 2024-yil yakuniga koʻra qariyb 1 milliard yevroni tashkil etdi. Moliyaviy yordamning asosiy hajmi xususiy sektorga toʻgʻri keladi.
Mamlakatimizning oʻrta muddatli Sheriklik strategiyasi samarali amalga oshirilmoqda. YTTBning ekspert koʻmagida bank sektorini transformatsiya qilish va biznes uchun imkoniyatlarni kengaytirish choralari koʻrilmoqda.
Uchrashuvda loyihalarni amalga oshirish sifatini yaxshilash va samaradorligini oshirish boʻyicha birgalikdagi ishlarning natijalari qayd etildi. Jarayonlarni optimallashtirish, loyihalarni tayyorlashni tezlashtirish muhimligi taʼkidlandi.
Kichik va oʻrta biznesni rivojlantirish, ayollar va yoshlar tadbirkorligini qoʻllab-quvvatlash, davlat-xususiy sheriklik loyihalarini, shu jumladan taʼlim, suv taʼminoti, maishiy chiqindilarni qayta ishlash kabi muhim yoʻnalishlarda hamkorlikni kengaytirish masalalari diqqat markazida boʻldi.
“Yashil” iqtisodiyot, dekarbonizatsiya, raqamlashtirish va sunʼiy intellekt, ipoteka bozorini rivojlantirish, transport kommunikatsiyalari va boshqa sohalardagi dastur va loyihalar hamkorlikning ustuvor yoʻnalishlari sifatida belgilandi.
Joriy yil iyun oyida Toshkent xalqaro investitsiya forumi va Xorijiy investorlar kengashining navbatdagi yigʻilishiga tayyorgarlik koʻrish va uni oʻtkazish yuzasidan ham fikr almashildi.
Keyinroq Shavkat Mirziyoyev va Yevropa komissiyasi prezidenti Ursula fon der Lyayen suhbatlashdi. Oʻzbekiston va YEI oʻrtasidagi oʻzaro manfaatli hamkorlikni yanada kengaytirish istiqbollari yuzasidan fikr almashildi. 4-aprel kuni boʻlib oʻtadigan hududlararo sammit va iqlim forumini oʻtkazish masalalari koʻrib chiqildi.
