Vazirlar Mahkamasi Toshkent shahrida oʻzini oʻzi band qilgan taksi haydovchilariga minivenlardan foydalanishga eksperiment tariqasida ruxsat berish toʻgʻrisida qaror qabul qildi.
Yuridik shaxslarga (agregatorlarga) “Toʻxtash taqiqlangan” yoʻl belgisi amal qiladigan hududda, shu jumladan aeroportlar va vokzallarga tutash hududda yoʻlovchilarni chiqarish va tushirish uchun toʻxtashga ruxsat beriladi.
Shuningdek, aeroportlar, temir yoʻl vokzallari, avtovokzallar, qurilish materiallari bozorlari, dehqon va buyum bozorlari, ustav kapitalida davlat ulushi 50 foizdan yuqori boʻlgan savdo majmualarining pullik avtoturargohlariga yoʻlovchilarni chiqarish va tushirish uchun bepul kirish nazarda tutilgan. Bundan tashqari, yoʻnalishli transport uchun ajratilgan maxsus yoʻlaklarda harakatlanishga ruxsat beriladi.
2025-yil 15-apreldan 2026-yil oxirigacha Toshkent shahrida eksperiment tariqasida oʻzini oʻzi band qilgan taksichilarga kamida toʻrt va koʻpi bilan sakkiz kishi sigʻadigan avtotransport vositalarida xizmat koʻrsatishga ruxsat beriladi.
