AQSH prezidenti Donald Tramp mamlakatga tovarlar importiga bojlar joriy etilishini eʼlon qildi. Roʻyxat 185 ta davlatdan iborat boʻlib, unda Oʻzbekiston ham bor.
Oq uy rahbarining soʻzlariga koʻra, AQSH tariflari miqdori boshqa mamlakatlarning xorijiy tovarlarga nisbatan oʻrnatgan bojlaridan ikki baravar kam boʻladi.
Xususan, Vashington Yevropa Ittifoqi tovarlariga 20 foiz, Xitoy uchun 34 foiz, Buyuk Britaniya uchun 10 foiz, Ukraina uchun ham 10 foiz miqdorida boj joriy qiladi. Roʻyxatda Rossiya tilga olinmagan.
Eng katta bojlar Lesoto va Fransiyaning dengizorti hududi Sen-Per va Mikelonga nisbatan qoʻllaniladi — 50%.
Markaziy Osiyo mamlakatlari uchun bojlar:
Qozogʻiston — 27%;
Oʻzbekiston — 10%;
Turkmaniston — 10%;
Qirgʻiziston — 10%;
Tojikiston — 10%.
AQSHga tovarlar yetkazib beruvchi barcha mamlakatlar uchun bazaviy bojxona tarifi 10 foizni tashkil etadi. Eng kam 10 foiz miqdoridagi bazaviy bojxona boji 5-apreldan amal qila boshlaydi. Bir qator mamlakatlar uchun “koʻzgu” tariflari 9-apreldan kuchga kiradi.
3-apreldan boshlab avtomobillar importiga 25 foizlik boj, 3-maydan kechiktirmay esa AQSHda ishlab chiqarilmagan avtomobil ehtiyot qismlarini olib kirishga boj qoʻllaniladi. Kanada va Meksikaga nisbatan joriy etilgan tariflar ham amal qilishda davom etmoqda.
Keyinroq Tramp milliy xavfsizlikka tahdid solayotgan savdo nomutanosibligi tufayli favqulodda holat rejimini joriy qildi. Uning soʻzlariga koʻra, tahdid manbai mamlakat tashqarisida joylashgan va AQSHning boshqa davlatlar bilan savdosida “oʻzaro kelishuv yoʻq”.
“Tahdid manbai AQSHdan tashqarida, asosiy savdo hamkorlarining ichki iqtisodiy siyosatida va global savdo tizimidagi tarkibiy nomutanosibliklarda joylashgan. Shu bilan mamlakatda favqulodda holat eʼlon qilaman”, — dedi u.
Trampning taʼkidlashicha, AQSHning asosiy savdo hamkorlari bilan iqtisodiy munosabatlar “ayniqsa soʻnggi yillarda oʻta muvozanatsiz” boʻlib qolgan.
