O‘zbekistonda yangi avtotransport vositasini ro‘yxatdan o‘tkazish uchun onlayn ariza berish xizmati test rejimida ishga tushirildi. Xizmat EPIGU da mavjud.
Hozircha undan faqat Toshkent shahridagi Fayzobod ro‘yxatga olish va imtihon bo‘limida foydalanish mumkin. Test sinovlari muvaffaqiyatli o‘tsa, tizim avval poytaxtda, so‘ngra hududlarda joriy etiladi. Ariza beruvchi Davlat xizmatlarining yagona davlat reestriga kirishi, xizmat turini tanlashi, uni ko‘rsatish usulini belgilashi va yaratilgan schyot-fakturani to‘lashi kerak.
Avtotransport vositasini ro‘yxatdan o‘tkazish uchun yig‘im 6,84 BHM (2,5 million so‘m), elektr transport vositalari, tirkamalar va mototsikllar uchun – 1,5 BHM (562 ming so‘m)ni tashkil etadi. Davlat raqamini berish qiymati 3,5 BHM (1,3 million so‘m), ro‘yxatdan o‘tganlik guvohnomasini berish uchun esa 0,7 BRV (262 ming so‘m) bo‘ladi.
Xizmatni joyida taqdim etishda yo’l harakati politsiyasi xodimi arizachi bilan bog’lanadi. Joylarda ro‘yxatdan o‘tish uchun qo‘shimcha to‘lov muddatga bog‘liq: kun davomida kelish uchun – 4 BHM (1,5 million so‘m), uch kunlik – 3 BHM (1,125 million so‘m), besh kunlik – 2 BHM (750 ming so‘m).
Bunda, agar ro’yxatga olish va imtihon bo’limidan masofa 10 km dan oshmasa, joydan tashqari ro’yxatga olish uchun qo’shimcha to’lovning asosiy miqdori qo’llaniladi. Ushbu masofadan oshib ketgan har bir qo‘shimcha kilometr uchun 0,05 BRV (18 750 so‘m) qo‘shimcha to‘lov olinadi.
