Ijtimoiy tarmoqlarda Buxoro viloyati hokimi Botir Zaripovning bolalar bog‘chasi hududidagi binoni qarorsiz buzish bo‘yicha topshiriq bergani aks etgan video paydo bo‘ldi. Viloyat hokimligi holatga izoh berdi.
Bog‘cha hududiga kirganlarning barchasini tekshirib, barcha huquqiy hujjatlarini ko‘tarib chiqasan. Kimda yo‘q bo‘lsa, hech kimga quloq solmay, hech qanday «sud-pud»siz buzasan. Bugunning o‘zidayoq buyumlaring, odamlaring bilan birga ko‘mib tashla, jin ursin. Bo‘ldi, endi bu «sudlar» bilan ovora bo‘lish yetar. Orqadan eshik ochganlarning hujjatlarini tekshirasan, – dedi hokim.
Kun.uz’ning qayd etishicha, hokim, shuningdek, viloyat ichki ishlar boshqarmasi boshlig‘iga, agar u tartib o‘rnatmasa, «tinchroq hududga» o‘tkazish bilan tahdid qilgan:
O‘rtoq boshliq, kecha viloyat hokimi kelishini bilgan edingiz. Shaharda o‘zingizni juda erkin his qilganingizni o‘zim tekshirib ko‘rdim. Bugun ham o‘sha manzara. Yoki siz jinoyatchilikning o‘sishiga olib keladigan holatlarga qarshi chora ko‘rasiz, yoki men sizni tinch hududga o‘tkazaman. Men allaqachon tegishli ko‘rsatma berganman. Meni tushundingizmi?
Botir Zaripov shahar hokimining ijtimoiy sohaga mas’ul o‘rinbosariga nisbatan intizomiy jazo qo‘llash rejalari haqida gapirdi.
Agar men aytganimdek, shahardagi ijtimoiy soha obyektlarida tartib o‘rnatilmasa, u javobgarlikka tortiladi. Bu barcha shahar hokimi o‘rinbosarlariga saboq bo‘lsin, – dedi u.
Buxoro shahar hokimining yoshlar, ijtimoiy rivojlantirish va ma’rifat masalalari bo‘yicha o‘rinbosari Feruz Hamroyevning ma’lum qilishicha, buyruq bolalar bog‘chasi hududiga emas, balki uning tashqarisidagi omborga o‘xshash binoga tegishli bo‘lgan.
Hokimlik matbuot xizmatining ma’lum qilishicha, 22-may kuni Botir Zaripov ishchi guruh boshchiligida Buxoro shahridagi 1961-yilda qurilgan 140 o‘ringa mo‘ljallangan 2-sonli davlat bolalar bog‘chasini borib ko‘rgan. Hozir muassasa avariya holatida bo‘lib, mahalliy byudjet mablag‘lari hisobidan kapital ta’mirlash ishlari olib borilmoqda.
Tashrif davomida hokim shahar hokimligi va mutasaddi rahbarlarga qurilish ishlarini jadallashtirish va qisqa muddatlarda yakunlash bo‘yicha topshiriqlar berdi.
Hokim bog‘cha hududini obodonlashtirish holatidan, shuningdek, bog‘chaga tutash hududdan tegishli ruxsatnomasiz «bolalar bog‘chasi hududiga noqonuniy kirish joyi» ochilganidan noroziligini bildirdi.
Shuningdek, u muassasa hududida joylashgan yuqori kuchlanishli transformator podstansiyasi atrofida to‘siq yo‘qligiga e’tibor qaratdi.
Videotasvirdagi «buzish» iborasi aynan bolalar bog‘chasi hududiga ruxsatsiz tashkil etilgan noqonuniy, yashirin kirishni bartaraf etishni nazarda tutadi. Hokim 140 nafar muassasa tarbiyalanuvchilarining xavfsizligini ta’minlash, yuzaga kelishi mumkin bo‘lgan salbiy va noqonuniy holatlarning oldini olishni asosiy maqsad qilib qo‘ygan. Shunga qaramay, ijtimoiy tarmoqlarning faol foydalanuvchilari bu iborani «xususiy bog‘chalarni buzishga ko‘rsatma» deb talqin qilishdi, bu haqiqatga to‘g‘ri kelmaydi va asosga ega emas,» – deyiladi xabarda.
Hokimlik ma’lumotlariga ko‘ra, viloyatdagi boshqa maktabgacha ta’lim muassasalarida ham bu kabi qoidabuzarliklarning oldini olish maqsadida Buxoro shahar hokimi o‘rinbosariga hayfsan e’lon qilingan.
2-bolalar bog‘chasidagi noqonuniy o‘tish joyi demontaj qilinib, qoidabuzarlikni bartaraf etish jarayoni videoga olinib, tegishli idoralarga yuborilgan va shundan so‘ng ijtimoiy tarmoqlarda tarqalgan.
Viloyatda qonun ustuvorligi ta’minlanayotgani, birorta obyekt noqonuniy buzilmayotganini alohida ta’kidlaymiz. Bu holatda hokim ayrim rahbarlarning mas’uliyatini oshirish uchun hissiyotga berilib gapirishga majbur bo‘lgan, – deya ma’lum qildi viloyat hokimligi.
