Qoraqalpogʻistonni qashshoqlik va ishsizlikdan xalos qilmoqchi: Prezident qanday qaror qabul qildi

Prezident Shavkat Mirziyoyev 5-noyabr kuni «Qoraqalpogʻiston Respublikasida olib borilayotgan islohotlarni yanada jadallashtirishga qaratilgan chora-tadbirlar toʻgʻrisida»gi qarorni imzoladi. Hujjat Qonunchilik maʼlumotlari milliy bazasida eʼlon qilindi va 6-noyabrdan kuchga kirdi.

2027-yil uchun asosiy maqsadlar:

• yalpi hududiy mahsulot oʻsish surʼati — 108%, sanoat — 107%, bozor xizmatlari — 117%, qishloq xoʻjaligi — 105%, qurilish — 113%;
• eksportni 550 mln dollarga oshirish va umumiy investitsiyalarni ikki baravar, 5 mlrd dollargacha koʻpaytirish;
• 125 ming kam taʼminlangan oiladan 513 ming kishini yuqori maoshli ish oʻrinlariga joylashtirish;
• qishloq xoʻjaligiga moʻljallangan 17 ming gektar yerni iqtisodiy aylanmaga kiritish va choʻl hududlarida 20 ming gektarda oziq-ovqat ishlab chiqarishni yoʻlga qoʻyish.

Nukusda 270 gektar maydonda 50 ming aholiga moʻljallangan «Nukus-siti» loyihalanadi va quriladi. Ishlar Toshkent shahar hokimligi koʻmagida, Yangi Toshkent tajribasi asosida olib boriladi. Yana 100 mlrd soʻm Toshkent budjetining ortiqcha bajarilgan qismi va shahar Taraqqiyot jamgʻarmasi mablagʻlari hisobidan Nur va Elobod mahallalarini obodonlashtirish va taʼmirlashga yoʻnaltiriladi.

Choʻl hududlaridagi 20 ming gektar yerda Misr tajribasi asosida yem-xashak yetishtirish joriy etiladi, buning uchun Misrdan mutaxassislar taklif qilinadi. Yaylovlarni tiklash uchun «Buzatov Agrostar» kompaniyasi tashkil etiladi: u oʻt va yaylov ekinlari urugʻlarini dronlar yordamida ekadi.

Bundan tashqari, 20 ming yosh axborot texnologiyalari va logistika sohasida oʻqitiladi, Orol dengizi hududida esa 50 ming gektar maydonda oʻrmonlarni bosqichma-bosqich tiklash boshlanadi. «Barsakelmes» konidagi tuz sanoat zonasini boshqarish uchun alohida direksiya tuziladi.

Eslatib oʻtamiz, fevral oyida Orol dengizining qurigan tubiga saksovul ekilgan edi, yozda esa respublikada Saykoʻl koʻli boʻyida safari majmuasini ochish istagi bildirilgan edi.