Haydovchilar bilishi kerak: toʻlanmagan jarima uchun mashina jarima maydonchasiga olib ketilishi mumkin

Ichki ishlar vaziri Yoʻl harakati qoidalarining buzilishiga doir maʼmuriy ishlarni rasmiylashtirish va koʻrib chiqish tartibi toʻgʻrisidagi yoʻriqnomani tasdiqladi. Hujjat Qonunchilik maʼlumotlari milliy bazasida eʼlon qilindi.

Bayonnomani inspektor joyida planshet orqali rasmiylashtiradi. Qoidabuzarning shaxsi biometriya orqali aniqlanadi, bayonnoma esa elektron imzo yoki barmoq izi bilan tasdiqlanadi. Qogʻoz bayonnoma faqat ayrim hollarda, masalan, haydovchi aybini tan olmasa yoki hududda aloqa boʻlmasa tuziladi. Inspektorlarga jarimani joyida olish taqiqlanadi.

Yana nimalar oʻzgaradi:

• ish 15 kun ichida koʻrib chiqiladi, joyi va vaqti haqidagi bildirishnoma Yagona interaktiv davlat xizmatlari portalidagi shaxsiy kabinetga yoki mobil ilovaga keladi;
• qarorga 10 kun ichida yuqori turuvchi organ yoki sudga shikoyat qilish mumkin;
• jarimani 60 kun ichida toʻlash kerak, aks holda mashina haqidagi maʼlumotlar inspektorlar planshetlarida paydo boʻladi va haydovchi jarimani joyida toʻlamasa, mashina bayonnoma rasmiylashtirilmasdan jarima maydonchasiga joylashtiriladi;
• kameralar qayd etgan qoidabuzarliklar uchun mashina egasi javob beradi, bunda takroriylik hisobga olinmaydi, kamera maʼlumotlari 48 soatdan kech kelgan boʻlsa, ish tugatiladi;
• ayrim qoidabuzarliklar uchun 2 tagacha jarima bali beriladi, ular bir yildan keyin olib tashlanadi, bir yilda 12 baldan ortiq toʻplansa, qoʻshimcha jazo qoʻllash uchun ish avtomatik ravishda sudga yuboriladi.

Avvalroq xabar qilinganidek, jarima ballarini radar va kameralar maʼlumotlari asosida ham hisoblashga qaror qilingan, bir yilda esa bunday ballarni 165 ming haydovchi olgan.