Сенатнинг Аграр ва сув хўжалиги масалалари қўмитаси раиси ўринбосари Рисқул Сиддиқов сув хўжалиги вазирига сўров юборди, деб хабар бермоқда парламент юқори палатаси ахборот хизмати.
Мурожаатда қишлоқ хўжалиги экинларини суғоришда 35 йиллик гидромодулли районлаштириш меъёрларидан фойдаланилиши қайд этилган.
Баъзи ҳолларда ўрнатилган сувни тежовчи технологияларнинг ҳар хил турлари маълум бир ҳудудга мос келмайди ва уларнинг самарадорлиги паст бўлади, чунки бундай технологияларни жорий этишда ҳудуднинг тупроқ-иқлим шароитлари синчковлик билан ўрганилмаган.
Бундан ташқари, сувни тежовчи технологияларни ўрнатиш учун кредит маблағларини ажратиш шартлари мураккаб бўлиб, айрим фермер хўжаликларининг ҳозирги иқтисодий аҳволи уларни амалга ошириш талабларига жавоб бермайди.
Ҳудудларда янги замонавий технологиялардан самарали фойдаланиш борасида фермер ва мутахассисларнинг малакаси етарли эмас.
Сенатор вазирдан жорий йилда суғоришнинг сувни тежайдиган технологияларини кенг жорий этиш, ерларнинг мелиоратив ҳолатини яхшилаш ва илм-фан янгиликларини ишлаб чиқаришга кенг жорий этиш, гидромодулли районлаштиришнинг янги нормаларини ишлаб чиқиш ва сув хўжалигини жорий этиш юзасидан тушунтириш беришни сўради.
Бундан ташқари, вазирлик томонидан сувни тежовчи технологиялар ва суғориш иншоотларида қурилмалар ўрнатиш, сув насосларини модернизация қилиш ва назорат қилишни хусусий шерикликка ўтказиш бўйича кадрлар тайёрлаш ва хорижий тажрибани ўрганиш бўйича амалга оширилаётган ишлар ҳақида маълумот беришни сўради.
