25 октябрь куни мамлакатни Европа мамлакатлари билан боғлайдиган Қўнғирот — Бейнеу автомобиль йўлининг 240 километрлик қисмини реконструкция қилиш якунланди. Очилиш маросимида Президент Шавкат Мирзиёев иштирок этиб, 323 миллион долларлик ушбу лойиҳа, айниқса, транспорт харажатларини 25 фоизга қисқартириш ва йўлнинг ўтказувчанлик қобилиятини 3 баробарга ошириш учун муҳимлигини таъкидлади.
«A-380» халқаро йўлагининг бир қисми бўлган автомобиль йўли жаҳон хавфсизлик стандартларига жавоб беради. Лойиҳа доирасида 200 дан ортиқ савдо ва саноат корхоналари ташкил этилиб, 7 мингга яқин иш ўрни яратилади, транзит хизматлари ҳажми йилига 200 миллион долларга, экспорт ҳажми эса 300 миллион долларга оширилади.
Янги йўл, шунингдек, Қорақалпоғистондаги бир миллиондан ортиқ аҳоли ҳаётини яхшилайди. Аввалроқ Ғузор — Бухоро — Нукус — Бейнеу магистралининг қисмлари таъмирланиб, Қорақалпоғистонни Хоразм билан боғлайдиган Амударё кўприги қурилди.
Президент лойиҳани амалга оширишга қўшган ҳиссаси учун Туркия, Озарбайжон, Хитой, Жанубий Корея ва Италия қурувчилари ва хорижий ҳамкорларга миннатдорлик билдирди.
Маросимда давлат раҳбари таъкидлаганидек: «Энди мамлакат ҳудуди бўйлаб халқаро қатновлар масофаси 1 минг километргача қисқартирилади, транспорт харажатлари эса 25 фоизга камаяди. Бу йўл мамлакатни Каспий ва Қора денгиз портлари орқали Европа бозорлари билан ишончли боғлайдиган логистика тармоғининг бир қисмига айланади. Яна бир муҳим жиҳат — «A-380» халқаро йўлагининг Ўзбекистон орқали ўтадиган қисмида кунлик транспорт оқими 3 баробарга ошади».
Шунингдек, муҳандислик иншоотларини мониторинг қилиш тизими тақдим этилди, у сенсорлар ёрдамида кўприкларнинг ҳолатини кузатиб боради, уларнинг узоқ муддатли эксплуатациясини таъминлайди ва хизмат кўрсатиш харажатларини тежайди. Пойтахтда Бобур кўчасидаги янги йўл ўтказгичда биринчи шундай тизим ишга туширилди. Президент бу технологияни Тошкент шаҳридаги 114 та йўлўтказгичга ва бутун мамлакат бўйлаб жорий этиш зарурлигини таъкидлади.
Сўнгги саккиз йилда Ўзбекистонда 2 минг километр йўл реконструкция қилиниб, 100 минг километр йўл замонавий полимер-бетон ва цемент-бетон қопламалар билан таъмирлангани уларнинг хизмат муддатини 1,5 баробарга оширди. Келгуси йилда хорижий компаниялар билан биргаликда яна 10 та йирик лойиҳа — 1 минг километр йўл қурилиши режалаштирилган.
