O‘zbekiston Qahramoni Quvondiq Sanaqulov O‘zbekiston gandbol federatsiyasi raisi etib saylandi, deb xabar bermoqda Milliy olimpiya qo‘mitasi.
Qo‘mitada bo‘lib o‘tgan saylov konferensiyasida “Navoiy kon-metallurgiya kombinati” bosh direktori va mamlakat suzish federatsiyasining amaldagi raisi nomzodi bir ovozdan qo‘llab-quvvatlandi. Sport vaziri Adham Ikromov Sanaqulovning yuqori professionalligi va sportni rivojlantirish bo‘yicha ko‘p yillik tajribasini qayd etdi.
Uchrashuvda, shuningdek, Gandbol federatsiyasining 2028-yilda Los-Anjelesda bo‘lib o‘tadigan yozgi Olimpiya o‘yinlariga tayyorgarlik ko‘rish rejasi muhokama qilindi. Erkaklar va ayollar terma jamoalarining sportning o‘yin turlari bo‘yicha saralash turnirlarida muvaffaqiyatli ishtirok etishi uchun shart-sharoitlar yaratishga alohida e’tibor qaratildi.
