Jurnalistlarni himoya qilish qoʻmitasi (CPJ) maʼlumotlariga koʻra, 2024-yilda dunyoda kamida 124 nafar jurnalist va OAV xodimi halok boʻlgan. Bu koʻrsatkich kuzatuvlar tarixidagi eng yuqori koʻrsatkich boʻlib, 2013-yildagi antirekordni yangiladi, oʻshanda 113 nafar media sohasi vakili qurbon boʻlgandi.
84 ta oʻlim holati qayd etilgan 2023-yil bilan taqqoslaganda, qurbonlar soni qariyb bir yarim baravarga oshgan.
Jurnalistlar orasida oʻlim darajasi yuqoriligining asosiy sababi Falastin-Isroil mojarosi boʻlib, unda 85 kishi halok boʻlgan. Shuningdek, Sudan va Pokistonda (6 tadan holat), Meksikada (5), Suriyada (4), Livanda, Iroq va Myanmada (3 tadan) ham koʻplab qurbonlar qayd etilgan. Boshqa bir qancha mamlakatlarda, jumladan, Ukraina va Rossiyada ommaviy axborot vositalari xodimlarining oʻlimi bilan bogʻliq yagona holatlar qayd etilgan.
CPJ taʼkidlashicha, bu maʼlumotlar, ayniqsa, jangovar harakatlar va beqaror hududlarda jurnalistlar uchun tahdidlar ortib borayotganidan dalolat beradi. Tashkilot xavfli sharoitlarda ishlaydigan media sohasi vakillarini himoya qilish choralarini kuchaytirishga chaqirmoqda.
Avvalroq Markaziy Osiyoda jurnalistlarning daromadi mamlakat, OAV turi va til bilish darajasiga bogʻliqligi haqida xabar berilgandi. Qozogʻiston media ish haqi darajasi boʻyicha yetakchi boʻlib qolmoqda, Tojikistonda esa jurnalistika eng kam haq toʻlanadigan sohalardan biri hisoblanadi.
