Oʻzbekiston Bojxona qoʻmitasining Milliy kinologiya markazi Toshkent shahri va mamlakatimiz viloyatlari bojxona organlarida xizmat qilayotgan xizmat itlarining xizmatlarini eʼtirof etdi. Rossiya spaniyeli, nemis ovcharkasi, ingliz koker-spaniyeli, malinua va Sharqiy Yevropa ovcharkasi kabi turli zotdagi 14 ta it maxsus nishonlar bilan taqdirlandi, deya xabar qildi idora matbuot xizmati.

2024-yilda ular yordamida 337 kg giyohvandlik vositalari, qariyb 55 ming dona psixotrop va kuchli taʼsir qiluvchi dori vositalari, 11 dona qurol-yarogʻ, 10 mingga yaqin patron, 24 kg porox, shuningdek, qariyb 2,3 mlrd soʻmlik xorijiy valyuta va 418 ming qutidan ortiq sigaretalarning noqonuniy aylanishining oldi olindi.

Bundan tashqari, xalqaro va respublika miqyosidagi musobaqa va koʻrgazmalarda yuqori natijalarni qayd etgan markazning 5 ta iti ham taqdirlandi.

Eslatib oʻtamiz, 2024-yil dekabr oyida Surxondaryo viloyatida qiymati 10 milliard soʻmdan ortiq boʻlgan qariyb 750 ming quti sigaret yoʻq qilingandi. Bu koʻrsatkich bojxona tarixida rekord boʻldi.