Samarqandda energetika sohasida korrupsiyaga qarshi kurashish boʻyicha masʼuliyatli yigʻilish boʻlib oʻtdi, deb xabar bermoqda Energetika vazirligi matbuot xizmati.
Joriy yilning 14-fevral kuni Samarqand viloyatida Bosh prokuror oʻrinbosari Shohrux Aminov boshchiligida energetika sohasidagi korrupsiya va tizimni “korrupsiyadan xoli soha”ga transformatsiya qilish masalalari muhokamasiga bagʻishlangan masʼuliyatli yigʻilish boʻlib oʻtdi.
Unda “Hududiy elektr tarmoqlari” va “Hududgaztaʼminot” aksiyadorlik jamiyatlarining Samarqand viloyati, tuman va shahar filiallari xodimlari hamda boshqa mutasaddilar ishtirok etdi.
Majlis davomida korrupsiyaviy jinoyatlarni sodir etganlikda ayblanayotgan yetkazib beruvchi korxonalarning 7 nafar xodimiga nisbatan qamoqqa olish tarzidagi ehtiyot chorasi qoʻllanildi.
Shuningdek, yigʻilish yakunida sohada korrupsiyaning oldini olish maqsadida taʼminotchi korxonalar rahbarlariga sohada tub oʻzgarishlarni amalga oshirish, ijro va mehnat intizomiga rioya etilishini qatʼiy taʼminlash, ayniqsa, xodimlar oʻrtasida profilaktik tadbirlarni yanada kuchaytirish boʻyicha topshiriqlar berildi.
Eslatib oʻtamiz, avvalroq Transparency International xalqaro korrupsiyaga qarshi tashkiloti 2024-yil uchun Korrupsiyani qabul qilish indeksini eʼlon qilgandi. Oʻzbekiston 180 mamlakat orasida 121-oʻrinni egalladi va oʻtgan yilga nisbatan bir ball yoʻqotdi. Mamlakat korrupsiya xavfi yuqori boʻlgan hududda qolmoqda.