Buxoro viloyatida 47 ta yoqilgʻi quyish shoxobchasi siqilgan gaz narxini gʻayriqonuniy ravishda oshirib yubordi. Tekshiruv shuni koʻrsatdiki, ushbu yoqilgʻi quyish shoxobchalarini boshqarayotgan 44 ta kompaniya oʻzaro kelishib, haqiqiy sabablarsiz narxni koʻtargan.
2024-yil 6-dekabrgacha yoqilgʻi quyish shoxobchalarida gazning 1 m³ narxi 3850-3950 soʻm boʻlgan, biroq 7-dekabrdan 9-dekabrgacha narx keskin koʻtarilib, 4150 soʻmga yetdi — bu 8 foizlik oʻsishni tashkil etdi. Raqobat qoʻmitasi mutaxassislari vaziyatni oʻrganib chiqib, narxlarning oshishi xarajatlarning koʻpayishi yoki boshqa obyektiv omillar bilan bogʻliq emasligini aniqladilar.
Natijada qoidabuzarlarga nisbatan ish qoʻzgʻatildi, ularga jarimalar solinib, kelgusida bunday holat takrorlanmasligi uchun qoidabuzarliklarni bartaraf etish majburiyati yuklandi.
Avval xabar qilinganidek, Buxoro viloyatida magistral gaz quvurida yirik yongʻin sodir boʻlgandi. Energetika vazirligi ushbu vaziyatni bartaraf etish uchun barcha zarur choralar koʻrilayotganini maʼlum qildi.
