Tashqi ishlar vaziri Baxtiyor Saidov va AQSH davlat kotibi Marko Rubio telefon orqali ikki mamlakat o‘rtasidagi hamkorlik, xususan, tovar ayirboshlash hajmini oshirish masalalarini muhokama qildi.
“AQSH Davlat kotibi Marko Rubio janoblari bilan birgalikda telefon orqali samimiy va samarali suhbat qurdik. Ikki va ko‘p tomonlama aloqalarining muhim mavzularini muhokama qildik”, — deb yozdi Saidov o‘zining Telegram kanalida.
Tomonlar O‘zbekiston Tashqi ishlar vazirligi va AQSH Davlat departamenti mamlakatlar o‘rtasidagi strategik sheriklikni istisnosiz barcha sohalarda kengaytirishda yaqin hamkorlikni davom ettirishga kelishib oldilar.
Saidovning so‘zlariga ko‘ra, ishbilarmon doiralar o‘rtasida mustahkam ko‘priklar o‘rnatish, ikki tomonlama savdo hajmini oshirish, Markaziy Osiyo va undan tashqarida farovon taraqqiyotni ta’minlash kun tartibimizdagi asosiy mavzulardan biri bo‘lgan.
Eslatib o‘tamiz, AQSH davlat kotibi Marko Rubio 2-fevral kuni Panama prezidenti bilan uchrashib, Panama kanali ishida o‘zgarishlar bo‘lishi mumkinligini muhokama qilgandi. Rubioning qayd etishicha, Trampning fikricha, Xitoy ta’siri xavf tug‘dirmoqda. Biroq Panama hukumati uni Xitoyga topshirganini rad etmoqda.
