Ijtimoiy tarmoqlarda oilaviy poliklinikalarda ayrim xizmatlar pullik bo‘lishi haqida ma’lumotlar paydo bo‘ldi. Sog‘liqni saqlash vazirligi bu borada izoh berdi.
Sog‘liqni saqlash vazirligi Tibbiy sug‘urta boshqarmasi boshlig‘i Shuhrat Almardanovning ta’kidlashicha, O‘zbekiston Konstitutsiyasiga muvofiq, fuqarolarga davlat hisobidan bepul tibbiy yordam ko‘rsatish kafolatlangan. Bunday xizmatlar ro‘yxatiga diagnostika, laboratoriya tahlillari, dori-darmonlar, tibbiy buyumlar va eng keng tarqalgan kasalliklarni davolash kiradi.
Yangi qonun loyihasi bilan bepul tibbiy yordamning kafolatlangan hajmiga kirmaydigan qo‘shimcha xizmatlar tushunchasi kiritilmoqda. Xususan, bemorlar tor doiradagi mutaxassislar tomonidan bepul davolanish uchun o‘z vaqtida tibbiy ko‘rikdan o‘tishlari va oilaviy shifokorga murojaat qilishlari shart. Agar shaxs yo‘llanmasiz to‘g‘ridan to‘g‘ri tor mutaxassisga murojaat qilsa, xizmatlar pullik asosda ko‘rsatiladi.
Sog‘liqni saqlash vazirligi shoshilinch va tez tibbiy yordam bepul ko‘rsatilishi davom ettirilishini ta’kidlamoqda. Yangilik davlat tibbiy sug‘urtasi tizimi samaradorligini oshirish va kafolatlangan hajm doirasida sifatli xizmat ko‘rsatishni ta’minlashga qaratilgan.
Avvalroq Sog‘liqni saqlash vazirligi ayrim dori vositalarini ro‘yxatdan o‘tkazishning yangi soddalashtirilgan tartibini tasdiqlagandi. Yangi tartib Yevropa Ittifoqi va YEOIIdan olingan jeneriklar, galen preparatlari va monopreparatlarni klinik tadqiqotlar o‘tkazmasdan ro‘yxatdan o‘tkazish imkonini beradi. Qaror ekspert kengashlarining tavsiyalari va ekvivalentlik yoki uzoq muddatli xavfsizlik ma’lumotlari asosida qabul qilinadi.
