Adliya vazirligi Oʻzbekistonda Energiya samaradorligi milliy agentligi tashkil etilishini maʼlum qildi. Bu haqda prezident qarorida aytilgan.
Energiya samaradorligini oshirish sohasida yagona davlat siyosatini amalga oshirish, ushbu sohada ragʻbatlantirish va taʼsir choralarini ishlab chiqish va tartibga solish Agentlikning asosiy vazifalaridan biri boʻladi.
1-iyuldan boshlab Agentlik davlat uy-joylarini energiya auditidan oʻtkazish xarajatlarini qoplash uchun quyosh panellari va quyosh kollektorlari qiymatining 20 foizi va issiqlik nasoslari (havo, suv va geotermal) qiymatining 40 foizi miqdorida, biroq BHMning 50 baravaridan (18.750.000 soʻm) koʻp boʻlmagan miqdorda subsidiya ajratadi.
1-sentyabrga qadar mamlakatda energiya samaradorligini oshirish boʻyicha raqamli platforma ishga tushiriladi. Agentlik huzurida budjetdan tashqari Energiya samaradorligiga koʻmaklashish va qoʻllab-quvvatlash jamgʻarmasi tashkil etiladi. Ishlab chiqaruvchilar va import qiluvchilar uchun 2025-yil oktyabrgacha texnologiyalarning energiya samaradorligi boʻyicha “yashil” standartlar joriy etiladi.
Eslatib oʻtamiz, “Milliy tiklanish” partiyasi rahbari Alisher Qodirov Energetika vazirligi va uning aholi bilan ishlashini tanqid qilgandi. “Bugun elektr energiyaning 75 foizi gazni yoqish orqali ishlab chiqarilayotgani, tarmoqdagi muammolar, ”yashil energetika“ni rivojlantirish borasidagi ishlar, loyihalar koʻlami haqida odamlarga kim maʼlumot beradi?” — deya savol qoʻygan Qodirov.
