«Oʻzbekneftgaz» sobiq rahbari Bahodir Sidiqov ishi boʻyicha ayblanuvchilar 25 nafarga yetdi — ular orasida Soliq qoʻmitasi sobiq rais oʻrinbosari bor

«Oʻzbekneftgaz» boshqaruvining sobiq raisi Bahodir Sidiqovga oid jinoyat ishida ayblanuvchilar roʻyxati 25 kishigacha kengaydi. Bu Oliy sud sud platformasining yangilangan maʼlumotlaridan maʼlum boʻldi. Avvalroq toʻqqiz nafar ishtirokchi haqida maʼlum edi.

Ayblanuvchilar orasida Soliq qoʻmitasi raisining sobiq birinchi oʻrinbosari Mubin Mirzayev bor. Unga Jinoyat kodeksining 167-moddasi 3-qismi «a» bandi (oʻzlashtirish yoki rastrata yoʻli bilan talon-toroj qilish) va 209-moddasi 2-qismi «a» bandi (mansab soxtakorligi) ayblanmoqda. 2026 yil iyulida boshqa ish boʻyicha Mirzayev 8 yil 2 oyga ozodlikdan mahrum qilingan.

Roʻyxatda shuningdek «Oʻzbekneftgaz» boshqaruvi raisining sobiq oʻrinbosari Baxtiyor Anorqulov, kompaniya xaridlar departamentining sobiq boshligʻi Dilmurod Burxonov, Enter Engineering vakili Ulugʻbek Usmonov va Eriell Management vakili Nodirjon Boboyev bor.

Sidiqovning oʻziga talon-toroj, mansab vakolatlarini suisteʼmol qilish, mansab soxtakorligi va jinoiy daromadlarni legallashtirish ayblanmoqda. Boshqa ishtirokchilarga epizodga qarab talon-toroj, soxtakorlik, vakolatni suisteʼmol qilish, pul yuvish va soliq toʻlashdan boʻyin tovlash ayblanmoqda.

Bular tergov bosqichida qoʻyilgan ayblovlardir. Hukm qonuniy kuchga kirgunga qadar barcha ishtirokchilar aybsiz hisoblanadi.

Eslatib oʻtamiz, iyul oyida «Oʻzbekneftgaz», Enter Engineering va Eriell sobiq rahbarlariga 10 yilgacha qamoq jazosi tahdid solayotgani maʼlum boʻlgan edi.